ORANJESTAD (AAN): Recientemente den un esfera ameno Minister Endy Croes a reuni cu Dr. Elizabeth Carey y sr. Brodie Carey fundado di 297 Baseball Academy
cu tin un facilidad di ‘gym’ y ‘cage’ hopi moderno na Barcadera. Tambe e academia ta duna curso y les pa prepara nos hoben atletanan cu tin e soño pa bay studia sea cu un beca of den un programa di baseball na Merca unda e programanan deportivo ta hopi grandi y profesional.
E meta di e encuentro ta pe mandatario haya informacion di e proyecto y loke 297 Baseball Academy ta ofrece. E academia ta cuminsa prepara e hobennan for di tempran pa ora yega Merca. Na Aruba bo ta entrena dos of tres bes pa siman y na Merca bo ta entrena cinco bes pa siman, tres hora pa dia ademas di hunga un partido di baseball den fin di siman. Tambe e academia ta yuda drecha e tecnica y ta prepara e atleta mentalmente.
Durante e reunion a trece dilanti e problematica cu e studiantenan cu caba MAVO ta enfrenta pa drenta Merca pa haya un ‘studielening’ unda cu nan mester pasa un ‘ged test’. Minister Endy Croes tabata hopi habri pa scucha y lo sondea e posibilidad con hunto den futuro por alivia esaki pa asina mas hobennan por haya e oportunidad pa sigui scolnan na Merca, si tin e talento y ta studia bon, por bin den un combinacion asina pa un carera.
