SV Caiquetio a bira campeon di Division Uno

ORANJESTAD (AAN): Den fin di siman a tuma luga e final di Division Uno. Arubaanse Voetbal Bond (AVB) tabata contento cu e resultado.

           Despues di e pito final por a conoce e campeon di Division Uno cu ta SV Caiquetio, cu tabata perdi 2-1 y a bolter e wega na nan fabor. E wega a termina 3-2.

            Andre Boekhoudt, head coach di River Plate, a indica cu durante e wega el a mira kico ainda nan falta. Tabata tin cierto cambio obligatorio cu mester a haci pasobra hungado a manca y esey a cambia e wega un tiki. Esey ta algo cu no por haci nada na dje. Ainda falta cierto caminda cu River Plate tin di bay mehora y pa ta miho para riba veld.

            River Plate tabata tin e wega gana 2-1. Faltando diescinco minuut a haci un cambio obligatorio ora cu un hungado no por a sigui mas, a crea un situacion cu a bay extra tempo. E coach a hay’e ta haci un otro cambio obligatorio cu a pone na final su defensa a pifia y wega a caba 3-2. Boekhoudt a expresa di tabata contento cu den temporada di Covid-19, nan por a hunga futbol. Tabata hopi importante p’e tabata bon organisa. Esaki ta prome final di Division Uno cu el a mira asina aki organisa.

            El a gradici nan y a manda palabra di pabien p’e team ganado, SV Caiquetio cu tin hopi hungado cu experencia riba veld y esey a hacie un tiki dificil pa nan. El a bisa e hungadonan di River Plate cu si ta haya dies chens y ta scop tur na banda of no ta causa un gol, ta perde e wega. River Plate a haya oportunidadnan, pero nan no a caba nan.

            SV Caiquetio a haya un wega duro y nan a lucha bon, segun Patrick Dwarkasing, head coach di Caiquetio. A prepara bon p’e wega final ya cu nan tabata sa con River Plate ta hunga. A hunga cu nan caba y a traha duro pa por a logra bay cu e titulo. Aunke nan tabata perdi, Dwarkasing a papia cu e hungadonan y a bisa nan pa keda trankil.

            Segun Dwarkasing, pa nan no sali lihe pasobra e chens nan ta haya. Tin hungado cu por crea algo y a scoge durante wega pa Marlon den e lineup, kende a resalta. Marlon a anota gol y tabata tin dos asistencia. No ta e so, pero henter team a resalta y nan por a bira campeon. Nan a hunga un bunita futbol, un structura cu tanto su persona como coach Emigene de Cuba tabata kier y por a mira e resultado. SV Caiquetio ta gradici AVB p’e mini campeonato despues di e periodo cu no por a hunga futbol. Tambe ta felicita River Plate pa sali subcampeon.

            Roderick Lampe, capitan di SV Caiquetio, a expresa di basta dia el a sintie caba ya cu nan tabata enfoca. E prome wega nan a perde contra River Plate pa mira ken ta bay number un y number dos. Nan a reuni na veld pa mira kico ta bay haci. “Cu sacrificio bo ta logra semper”, el a expresa. Tanten cu referee no fluit e wega no ta caba nunca, nan mester a sigui. SV Caiquetio tabata perdi, pero a empata wega y pa bay 30 minuut extra pa por a gana 3-2.