SV Britannia representando Aruba den CFU Shield Cup 2026

Ministro Gerlien Croes ta orguyoso:

ORANJESTAD (AAN): Club campeon nacional di futbol di Aruba, S.V. Britannia ta representando Aruba actualmente den e CFU Shield Cup 2026 cu ta tumando luga na Trinidad, despues di un periodo intenso di preparacion y coordinacion pa haci e participacion internacional aki posibel.

   Durante un conferencia di prensa, directiva di S.V. Britannia a comparti detayenan di e biahe, indicando cu, a pesar di reto financiero inicial, nan a logra supera obstaculonan danki na un esfuerso conhunto y dedicacion extraordinario durante varios dia.

   E participacion di e club a bira realidad danki na e sosten financiero y apoyo di Lotto pa Deporte, Arubaanse Voetbal Bond (AVB) y Ministerio di Deporte, bou liderazgo di Minister Gerlien Croes. E prome grupo di e delegacion a sali rumbo pa Trinidad diamars siman pasa, sigui pa un segundo grupo diaranson siman pasa, y cu nan prome partido oficial cu a tuma luga diasabra, 25 di juli caminda Aruba a cay venci pa 1 gol.

   Minister Gerlien Croes a expresa su gratitud y orguyo pa e ekipo: “Nos ta aprecia e sacrificio di nos hungadonan, directiva di S.V. Britannia y famianan. Durante añanan, nan a dedica nan mes completamente na deporte, demostrando disciplina y compromiso pa representa Aruba na nivel internacional”.

   Minister Gerlien Croes a enfatisa e compromiso continuo di Gobierno pa apoya talento local, y a revela cu actualmente tin conversacionnan activo pa desaroya un modelo educativo pa deportistanan, combinando estudio online cu entrenamento durante dia.

   Di parti Gobierno di Aruba, AVB y Lotto pa Deporte a felicita S.V. Britannia como campeon di temporada 2024/2025 y a reafirma nan compromiso pa sigui inverti den desaroyo di futbol y talento Arubano. Ambos entidadnan a subraya importancia di uza fondonan de manera responsabel pa crea oportunidadnan sostenibel pa nos deportistanan.

   E participacion di S.V. Britannia den e CFU Shield Cup ta un paso importante pa deporte Arubano, brindando visibilidad internacional y experencia balioso pa nos atleta.

   Minister di Deporte, señora mr. Gerlien Croes a desea S.V. Britannia representando Aruba, hopi exito na Trinidad den e CFU Shield Cup y ta anima tur hende pa brinda nan apoyo.