SV Aruba Juniors ta cumpli 90 aña Diasabra awor

ORANJESTAD (AAN): Riba 5 di februari 1932, 90 aña pasa, un grupo di amigo bou guía di Selin Fingal a reuni pa lanta un ekipo di futbol.

Den e reunión nan a cambia di idea pa enbes di lanta un team di futbol nan lanta un club deportivo.

            Tabata e mes un Selin Fingal cu a propone e nomber Aruba Juniors despues di a lesa nombernan manera Argentino Juniors y Boca Juniors den un revista.

            Den añanan 30 y 40 Aruba Juniors tabata bon conocí den mundo di futbol. Mirando cu recien Arubaanse Voetbal Bond-AVB, tambe a cumpli 90 aña lo mester ta cu Aruba Juniors ta un di su prome miembronan.

            SV Aruba Juniors a participa pa añanan largo den campeonato di AVB y a sali campeón pa prome biaha na 1934. Na 1960 Aruba Juniors a representa Aruba den e prome Copa Antiyano hunto cu SUBT, Jong Holland y RCA. Tambe Aruba Juniors su team di futbol a participa na varios torneo internaciónal manera na entre otro Corsou, Santo Domingo, Puerto Rico y San Salvador.

            Notabel ta cu na aña 1952 e selección di Antiyas cu a participa na e olimpiada di Helsinki tabata forma pa algun hungado di Aruba Juniors di cual dos tabata estelar. Y mester corda cu ta Juan Briezen di Aruba Juniors a score e goal na e olimpiada pa Antiyas Hulandes

            Como un club deportivo renombra Aruba Juniors a duna e oportunidad na su miembronan pa practica diferente deporte durante añanan. Banda di futbol por a practica deportenan manera korfbal, tennis, baseball, softball y basketball entre otro. Banda di deporte, den añanan 60 y 70, Aruba Juniors tabata conocí pa su fiestanan cu e miho bandanan di nos región manera Johnny Ventura y Ismael Rivera.

Actualmente Aruba Juniors tin varios team di basketball cuminsando cu muchanan di 9 aña te cu adulto.     Tambe tin baseball infantil y softball di liga 50 y 60.

            Directiva lo organiza un siman deportivo pa conmemora e 90 añanan di Aruba Juniors. Manera custumber lo reconoce algún miembro durante un encuentro social. E prome actividad lo ta un misa cual lo ta diasabra awo 5 di februari 2022 na misa di playa pa 7or anochi.