Stingray Swimming Team orguyoso cu prestacion di Leandro Santiesteban na NACO 2025

ORANJESTAD (AAN): Stingray Swimming Team ta sumamente orguyoso pa anuncia e tremendo prestacion di nan atleta,

Leandro Santiesteban, durante NACO Invitational 2025 na Santo Domingo. Stingray Swimming Team a keda na di 25 lugar entre 52 team internacional.

   A pesar cu Leandro tabata su so, el a representa Stingray cu un espirito di guerero, determinacion, disciplina y curason. El a lucha contra esunnan di region, contra e presion di un campeonato grandi y tambe contra circunstancia personal, cu ta mustra cu Leandro ta un atleta di nivel.

   Un torneo di curason y determinacion: Desde diahuebs Leandro a demostra su determinacion, demostrando un nivel di madures, fe y caracter cu ta yega mas leu cu su edad.

   Su resultado final ta simplemente inspirativo:

(*) 5 medaya di oro.

(*) 1 medaya di plata.

(*) 4 Personal Bests.

(*) 1 Record Nacional 11-12 den 50m Fly: 27.48, desde 2009.

(*) High Point Trophy: 1 lugar Boys 11–12.

   E logro aki ta mas impresionante, ya cu riba e ultimo dia Leandro a tene cu lucha tambe cu un virus cu varios landador mas a haya. Pero asina mes, pero asina mes e no kier a retira for di competencia. El a confia den su fe, su disciplina y e apoyo di su mama, tata, Coach Moises di Panama y e cuido di e staf medico na competencia

   Stingray Swimming Team na di 25 lugar:  Pa henter e team di Stingray, e logro aki sigur ta di aplaudi, ya cu Stingray Swimming Team tabata representa unicamente pa Leandro. Sinembargo, entre 52 team, nos club a termina na un impresionante lugar nr 25.

   Esaki ta un demostracion cla cu un atleta cu trabao duro, caracter, determinacion y dedicacion por pone henter un team mas ariba den ranking internacional. Pues no ta solamente un triunfo personal di Leandro, pero un triunfo pa Stingray, pa Aruba y pa tur mucha cu kier sigui lucha pa logra nan soño.

   Stingray Swimming Team ta felicita Leandro Santiesteban pa su curashi, balentia, entrega, su espirito di campion y su representacion noble di e bandera y nan club.