Atleta Elisabeth Timmer a gana dos medaya di oro y a logra un record nobo na Hulanda

Stingray Swimming Team

ORANJESTAD (AAN): Stingray Swimming Team ta sumamente orguyoso pa anuncia un otro logro excepcional di atleta Elisabeth Timmer, durante e Provinciale Kampioenschappen 2025 na Hulanda. Elisabeth a demostra disciplina, forsa y determinacion riba un nivel internacional, representando Aruba cu un elegancia y forsa digno di un campeon.

Dos medaya di oro y 1 record Arubano 

Su tempo extraordinario di 55.50 no solamente a logra posiciona Elisabeth na prome lugar, pero tambe a kibra e Record Arubano den 100m freestyle short course. Esaki ta un logro cu ta mustra su crecemento continuo y su entrega total na e deporte.

Elisabeth a sigui dominando den sprint cu un 25.49 den 50m freestyle, sigurando un otro medaya di oro. Su salida, tecnica y aceleracion final tabata simplemente magistral.

Otro atleta mas cu determinacion y curason

Elisabeth sigur ta un ehempel mas pa nos landadornan hoben: humilde, disciplina y semper cu deseo pa mehora y duna excelente prestacion. Su prestacion na Hulanda ta confirma cu Aruba tin talento internacional cu sigur por competi cu e mihornan di e region y mas leu.

Stingray Swimming Team a indica cu ta un honor pa guia e atletanan manera Elisabeth riba e caminda di excelencia, un caminda yena cu logronan grandi y inspiracion pa e generacion cu ta sigui.

Stingray Swimming Team ta manda un pabien grandi pa Elisabeth cu su dos medaya di oro y su record nobo. Aruba ta orguyoso di dje y ta sigui balora, guia y celebra su crecemento den tur competencianan.