Sra. Kirsty Coventry a keda eligi como e di dies presidente di International Olympic Committee

Un momento historico pa Comite Olimpico Internacional 

ORANJESTAD (AAN):   Na Costa Navarino na Grecia, e eleccion pa un presidente nobo di “International Olympic Committee” (IOC) a tuma luga. Un total di 7 candidato a postula nan mes, di cual Sra. Kristy Coventry di Zimbabwe a keda eligi como e di dies presidente di e Comite Olimpico Internacional. Esaki ta un momento historico, como e lo ta e prome presidente femenino y di e continente Africano pa wordo nombra como presidente di IOC.

            Sra. Kirsty Coventry ta un campeon Olimpico cu 7 medaya en total , cu ta hacie e atleta Olimpico mas decora di e continente di Africa, ademas di a logra diferente record mundial den natacion. Den su carera despues di natacion, e la cambia di profesion y a drenta politica, unda cu awendia e ta e minister di Hubentud, Deporte, Arte y Recreacion di su pais Zimbabwe.

            Comite Olimpico Arubano ta felicita Sra. Coventry cu e nombracion historico y ta desea su persona tur clase di exito cu e reto nobo aki.