Spuiters  y Marlboro ta bay topa otro den e gran final di Baseball 40 plus

ORANJESTAD(AAN): Diasabra den Joe Laveist Ballpark a tuma lugar e dos semi finalnan di Baseball 40 plus, pa determina kendenan lo topa den e final riba 27 di November.

E prome wega tabata entre Spuiters y Blue Lotus y apesar cu Blue Lotus tabata gana laat 2-0, Spuiters a bin bek pa gana e wega 6-2.

Den e otro wega tambe e team cu tabata perdi a bin bek pa gana, esta Marlboro.

LeftOvers a tuma un ventaha di 4-0, pero Marlboro a logra empata 4-4.

Ora cu den di 7 y ultimo inning LeftOvers a kere nan ta bay gana e wega 7-4, un biaha mas Marlboro a logra empata e wega pa bay extra inning.

Den extra inning LeftOvers no a probecha di algun bon oportunidad di anota y na dado momento Marlboro a anota pa gana e wega 8-7.

Esey nifica cu Marlboro y Spuiters lo topa den e final proximo Diasabra den Joe Laveist Ballpark.