Smileys All Stars a sali campeon di volleyball di Jani Brokke memorial 2025

ORANJESTAD (AAN): Desde 23 di augustus ultimo, Fundacion Movemiento ta Bida a cuminsa cu e weganan deportivo 60plus di Jani Brokke memorial 2025.

Ya caba diferente wega a tuma luga den diferente deporte, entre otro; Tenis, bowling, domino, biyar, dam, softball, wandel voetbal, caminta, shaken, y volleyball. Por bisa cu tur e weganan tawata exitoso y bon atendi. 

E torneo di volleyball cu a tuma luga dia 12 di september na Sports Hall (Centro Deportivo Libertador betico Croes), tambe tawata uno bon organisa cu varios ekipo na unda cu Smileys All Stars a sali campeon y Heart Attack a sali sub campeon. Por a ripara cu cada ekipo a trece nan sostenedornan cu a apoya nan y sigur a trece dushi ambiente pa anima e diabierna anochi for di 7’or pa 11’or. 

Clausura di e weganan deportivo 60plus di Jani Brokke memorial 2025 ta dia 20 september cu entregamento di premio na Centro di Bario Dakota.