Ministro a ricibi cabayistanan di Aruba cu a gana medaya na Curaçao

ORANJESTAD (AAN): Manera ta conoci, algun siman pasa Aruba su atletanan di Paso Fino, a logra di haya medaya di Oro y Plata na Curaçao pa jinete y amazona di Aruba

   En total 3 participante di Aruba a biaha pa competi den "Inter Corsou", competencia di Equitacion huzga pa juez di Republica Dominicana y Colombia.

   Aruba su amazona Sheyxienne Geerman, den su debut na Curaçao, a logra medaya di Plata riba e cabay Polvo Robado den categoria di 9 pa 11 aña.

   E otro atleta, Zachary Coffie a gana medaya di Oro den categoria di 15 pa 17 aña riba ehemplar Suavidad de la Siberia.

   Caitlin Ras den categoria amazonas 25+ tambe a conkista medalla di Oro riba Polvo Robado. Caitlin a bolbe pista despues di un ausencia cu un bunita presentacion.

   Ministro di Deporte Gerlien Croes, recien a ricibi e medayistanan aki na su oficina, unda el a felicita nan pa e logro, pa splica cu Aruba ta orguyoso di nan.  Tambe Ministro a presenta nan cu algun plaquette bunita pa nan corda cu Aruba tambe ta contento cu nan logro.