Siete veld di futbol rond di Aruba ta bay haya pronto turf artificial

Ehecutivonan di FIFA ta di bishita

ORANJESTAD (AAN): Recientemente, e asina yama ‘FIFA Artificial Turf expert’, esta Alastair Cox hunto cu Jordan Victoire (FIFA Regional Development Manager) acompaña pa presidente di Arubaanse Voetbal Bond (AVB) Sr. Randolf Lacle, secretario general Señora Dyane Wiersma y Sr. Pancho Croes (Project Manager) a haci un bishita na Minister President di Aruba Evelyn Wever-Croes y Minister di Enseñansa y Deporte Endy Croes.

   Esaki tabata pa dialoga tocante e fase final di e Proyecto di Turf pa e 7 veldnan di Futbol na Aruba. Team di consehero Sr. Francis Croes y Sr. Chito Geerman tambe a acudi pa asina tur brinda apoyo pa realisa e Proyecto di Turf.

   FIFA y AVB a confirma cu e 7 veldnan inicial ta pa e veld di Nacional na Alto Vista, veld di SV Bubali, veld di RCA Arena na Solito, veld di SV River Plate na Eagle, Veld di Dakota, Veld di SV Estrella na Papilon, y veld di SV La Fama na Savaneta.

   Tin algun rekisitonan cu mester atende y finalisa dentro di poco. E mandatario di Deporte ta indica cu e tabata un reunion exitoso. E proyecto aki lo eleva e nivel di futbol aki na Aruba. Esnan cu ta bin na remarke pa FIFA ta categoria di mucha, hoben y futbol femenino.

   Pronto FIFA lo t’ey back pa firma un acuerdo pa e proyecto aki cu lo inicia comienso di aña 2025. Minister Endy Croes ta gradici Prome Minister Evelyn Wever-Croes, Gobierno di Aruba, FIFA, AVB y tur stakeholder cu hunto ta logrando proyectonan bunita pa e deporte di futbol.