ORANJESTAD (AAN): Despues di 3 dia largo di competencia, Aruba ta conkista un medaya di Brons den e Categoria di Amazonas 25+, un logro sumamente importante pa Lea Vink.
Durante un categoria cu a tarda 2 ora cu competencia hopi fuerte, Lea Vink a logra Medalla di Brons pa Aruba. Enfrentando competencia hopi fuerte di Puerto Rico, USA, Colombia, Curaçao y Venezuela, Aruba a saca cara pa demonstra e calidad cu nos tin den Equitacion.
Riba diahuebs, e prome dia di competencia Mia Rose Tromp a haci un bunita presentacion pero no a logra clasifica pa sigui. Diabierna den su debut den un Mundial, Zachary Coffie a clasifica entre 11 jinete pa e siguiente etapa, pero no a logra keda cu un di e 6 premiacion cu tin.
Diasabra a cuminsa cu Courtney Irausquin, ken a haci un bunita recorrido pero entre competencia fuerta y di 4 ora, no a logra clasifica den e categoria di 15-17 aña. Carolina de Cuba y Genesis Pietersz ambos a representa Aruba den categoria di 18-20 aña, caminda Genesis a logra clasifica entre 10 Amazona, y aunke a haya palabra di elogio di e juez, no a logra pa por a haya un cinta.
Den un competencia caminda e pais anfitrion a domina mayoria di e categorianan y bay cu mayoria di medaya, OCA ta hopi orguyoso di e presentacion di nos Jinete & Amazona.
https://diario.aw/categories/noticia/deporte/aruba-cu-medaya-di-brons-den-mundial-di-equitacion#sigProIdd6eba7ad9d
