Siete atleta di #TeamARU a firma Beca Olimpico pa 2025–2028

ORANJESTAD (AAN): Siete atleta Arubiano a logra un paso importante den nan soño Olimpico.

Den presencia di Comite Olimpico Arubano (COA), e deportistanan a firma un contrato cu lo duna nan un Beca Olimpico pa e periodo 2025–2028. 

E beca, cu ta bin atraves di programa di Solidaridad Olimpico di Comite Olimpico Internacional, lo yuda cu recurso financiero pa cubri gasto di entrenamento y preparacion deportivo. Esaki ta duna e atletanan oportunidad pa concentra 100% riba nan meta: clasifica pa weganan Olimpico Los Angeles 2028. 

E 7 atleta cu a ricibi e beca ta: Ethan Westera, Kaj Rozeboom y Zara Rozeboom (Olympic Windsurf), Mikel Schreuders, Patrick Groters y Chloe Farro (landamento), y Maelynn Fradl (taekwondo kyorugi). 

COA ta felicita e deportistanan pa nan esfuerzo y logro deportivo durante e ultimo añanan, cu awe a resulta den un apoyo tan importante pa nan desaroyo y futuro Olimpico.