Seleccion di Damas Futbol ta preparando pa viaha pa Colombia

ORANJESTAD (AAN): Den oranan di anochi, e seleccion di Damas Futbol a tene un wega di fogeo, cu e team U-15 di futbol di Aruba.

   Segun Diane Wiersma, kende ta coordinadora di futbol femenino di AVB, nan a tene e wega aki cu e hobennan di Academy U-15, debi cu e seleccion femenino ta preparando pa competencianan na Colombia, pa asina hunga tres wega amistoso, y participa den training riba teritorio Colombiano, y asina a bin cu e idea di laga nan hunga contra U-15.

   Tambe tin algun hungador femenino procedente di Hulanda aki, pa asina nan hunga como team y di e forma aki coachnan por tin un mihor bista ta con e seleccion ta para.  Tin algun cu a nace na Aruba y a bay biba na tera frieu. Tambe tin cu a nace na Hulanda y a bin aki como cu nan famia ta di Aruba.  Pesey a yama nan pa reforza e seleccion di Damas.

   Despues di U-15, den futuro tin chens cu ta laga nan train cu grupo di mucha hombernan mas grandi tambe.  Pero na Colombia, e team di Damas lo ta enfrentando equiponan femenino so.

   Den lunanan di September te cu November, tin Nations League y tambe Gold Cup, y aki e team di seleccion femenino ta spera di por hunga e home-games na Aruba mes.  Si acaso stadionnan no ta cla, of no a wordo aproba, e ora Aruba ta obliga di viaha pa exterior pa hunga e weganan aki riba veldnan cu ta aproba.

   E seleccion di Damas di Aruba lo sali awe Diaranzon rumbo pa Colombia.