Luna di Juni lo bay tin competencia di Caribbean Fighting Championship na Aruba

CTC-9 ta parce di lo kibra tur record

ORANJESTAD (AAN): Recientemente e organizadornan di e CFC edicion number 9 a tene un conferencia di prensa na Manuelito's Bar relaciona cu e peleanan di MMA cu nan lo ta organizando dia 24 di juni venidero.

   Promotor Manolo Valdez a conta cu e CFC 9 lo sobrepasa tur e otronan cu e a tene den pasado y lo kier mira 10.000 hende den AEC. E fight card ta consisti di 18 pelea unda cu 5 pelea por bira a main event depende cual di nan haya e acogida mas grandi mirando e interes cu lo bini for di comunidad.

   Tambe contrario na e otro edicionnan anterior e biaha aki lo bay tin un 'halftime show' cu varios artista di Aruba y Curaçao cu lo deleita e publico y unda por gana hasta premio. Lo tin varios promocion cu lo cuminsa for di awor caba y lo ser anuncia pronto. Segun entendi lo tin diferente prijs pa entrada, depende di area cu bo kier sinta.

   Den e peleanan, a haya sa cu Team Moldan di Republica Dominicana lo tey un bes mas presente cu nan bringadornan feroz y den pasado a haci daño na nos bringadornan di Aruba. Lo tin un pelea femenino unda nos lo mira Arvice Dijkhoff di Aruba contra Colombia. Tambe lo bini algun bringador di Hulanda, Paraguay, Curaçao y Colombia cu lo bin midi forza contra nos bringadornan di Aruba.

   Di Aruba mes, tanto Evan Nedd y Gregory Milliard lo mira accion contra dos pugil duro di exterior. Evan lo ta preparando na Hulanda unda e ta residencia, y Milliard ta preparando su mes localmente, pero lo atende algun campo di entrenamento den exterior.

   E dos rumannan Jeandrick y Dijendrick Croes tambe lo por bira main event ya cu den un pelea tin faha envolvi.

   Manolo Valdez a anuncia cu probablemente Davon Duncan lo bringa Wally Wester pero Duncan lo mester firma un contract prome. Tin hopi bringado di Aruba cu lo faha contra esnan di exterior.

   A ser splica, cu e competencianan aki lo bay ta den Aruba Entertainment Center.