Seleccion di damanan hoben U15 a sali pa competencia di Concacaf

Competencianan na Tampa

ORANJESTAD (AAN): Un cantidad di mayor tabata presente Diahuebs atardi na Aeropuerto Internacional Reina Beatrix, pa asina despedi y desea e futbolistanan femenino hoben tur clase di exito.

   E seleccion femenino di U15 di Arubaanse Voetbal Bond, a sali rumbo pa Tampa pa asina competi na e campeonato di Concacaf pa mucha muher bao 15, cu lo ta na Hillsborough County Tournament Sportsplex na Tampa, Florida.

   Aruba ta biahando cu un seleccion bon prepara. E prome wega di nos seleccion ta Diadomingo awor pa 11’or di mainta contra Honduras.

   E actual campeon di Concacaf Girls’ U-15 ta e team di Merca.  E competencianan aki lo ta for di 31 di Juli te cu 7 di Augustus.  Lo tin dos grupo cu ta forma parti di Liga A.  Aki e Grupo A ta Mexico, Costa Rica, Republica Dominicana, y Wales (team invita).  Grupo B tin Merca, Canada, Jamaica, y Puerto Rico.

   E otro diesdos team ta ocupa Liga B.  Den Grupo C tin Bermuda, Belize, Anguilla, y Martinique.  Den Grupo D tin Aruba, Honruas, Bahamas, y US Virgin Islands.  Den Grupo E tin Nicaragua, Guyana, Turks & Caicos, y Cayman Islands.

   Ministro di Deporte tambe tabata presente pa desea president di AVB, Sr. Randolf Lacle, tur coach, y e grupo tur clase di exito.