Sarah-Quita Offringa a gana su di 15 titulo como campeon mundial den Freestyle Windsurfing

Reina Mundial di windsurfing:

ORANJESTAD (AAN):  Den un logro impresionante y historico, Sarah-Quita Offringa, conoci como ARU 91, a gana su di 15 titulo mundial den Freestyle Windsurfing na e PWA World Cup di Fuerteventura 2024.

            E atleta, cu a representa Aruba cu gran orguyo, a continua pa demostra su maestria y dominio den e deporte, consolidando su posicion como un di e mayornan den e categoria.

            Sarah-Quita, cu ta un figura inspirado y un modelo pa hopi, a dedica su victoria na su comunidad y tur esnan cu a sostene su a traves di su carera.

            E competencia a tuma luga den un ambiente desafiante, cu participantenan di tur rincon di mundo, pero e habilidad y determinacion di Offringa a sobresali, duna hende un espectaculo di talento y pasion.

            Cu e logro aki, Sarah-Quita Offringa ta sigui inspira y motiva e generacionnan nobo di windsurfers, mustrando su dedicacion y esfuerzo, cu tur cos ta posibel. Su trayectoria ta un testimonio di su compromiso pa su deporte y pa Aruba.

            Sarah-Quita Offringa a cera e di cuater dia di e PWA World Cup di Fuerteventura 2024 cu un otro titulo mundial na su nomber y a sigura su titulo mundial number 15 mundial den Freestyle - y su di 23 titulo total - despues di produci un mezcla di moves sliding y moves di poder pa vence e reto di Oda Brødholt (Starboard / Severne Sails) den e final.

            E situacion lo por bira ainda miho pa Offringa di 33 aña, ya cu e lo lucha pa e titulo mundial number 24 a partir di e di seis dia, ya cu  tambe e lo competi den Slalom X y, na e momentonan aki, ta lider di e carera pa e titulo mundial despues di a gana e prueba inaugural na Gran Canaria na cuminsamento di e luna aki.

Potret: PWA World Tour