Gimar Croes di SV Dakota:
ORANJESTAD (AAN) – Den un conferencia di prensa yama pa e directiva di Centro di Bario y Deporte Dakota, Gimar Croes di SV Dakota, Carmichael Bikker, Presidente y Edsel Lopez di PKF Accounting, a hiba palabra, relaciona cu e relatonan financiero di SV Dakota, cu ta na ordo te cu 2023.
Gimar Croes a informa di e ultimo desaroyonan entorno e team di futbol SV Dakota, despues cu un par di luna atras nan a sinta den e mesun localidad aki, pa acerca PKF Accounting p’asina aki yuda SV Dakota cumpli cu e responsabilidad di su relato financiero. El a bisa cu nan a entrega e prome parti tambe na e Bestuur di Centro di Bario Dakota, presidi pa señor Carmichael Bikker, p’asina aki cumpli cu nan deber cu nan tin hunto cu nan partners, sponsors, comunidad, y Hunta Directiva di Centro di Bario Dakota.
Gimar Croes a expresa cu ta cu hopi placer y sumamente contento, y gradici tanto cu señor Edsel Lopez como cu señor Herbert van Elferen, cu a sa di tuma nan cu braza habri y a contribui enormemente p’asina aki SV Dakota, awe oficialmente, tin tur su relatonan financiero na ordo te cu 2023. Pues, nan a cera di 2020 te 2023, y a haci entrega oficial di esakinan tambe na Centro di Bario y Deporte Dakota.
“E ta hopi importante, manera nos a mira cu SV Dakota, conhuntamente carga y, sigur, cu apoyo y sosten enorme di CBD, ta full ongoing cu e proyecto di un Master Plan cu nos tin pa cu e bario. Y sigur un di e exigencianan pa cumpli cu e parti aki ta e aspecto financiero. Nos sa tambe cu tin e parti di FIFA cu ta cay tambe cu e proyecto di bin cu un veld, un exigencia cu ta mara cu e Club Liaisons, cu sigur un di nan ta pa cumpli cu bo relato financiero”, Croes a señala.
El a agrega cu e Centro di Bario y Deporte Dakota a pone hopi enfasis pa SV Dakota por cumpli cu esaki. Seguidamente a haci entrega di e relatonan financiero na Centro di Bario y Deporte Dakota.
