Rory van Ulft y Ettel Boyce ta briya na Guayaquil

Atletanan di Aruba den hisamento di peso...

• Rory ta gana 12 medaya di oro y pone 14 record
• Ettel ta termina segundo den tanda 61kg B femenino senior

ORANJESTAD (AAN): Aruba Amateur Weightlifting Association (AAWA) ta anuncia cu orguyo e resultadonan excelente cu Aurora “Rory” van Ulft y Ettel Boyce a logra durante e Campeonato Panamericano Hubenil (Sub-15 y Sub-17) y Campeonato Suramericano (Sub-15, Sub-17, Sub-20 y Mayores) di Weightlifting, cu a tuma lugar na Guayaquil, Ecuador, for di 24 pa 30 augustus 2026. Como cu esaki tabata un campeonato combina, a presenta e oportunidad pa un atleta Sub-15 y Sub-17 manera Rory pa gana medaya den ambos campeonato y multiple categoria di edad.

   Rory van Ulft: Campeon Hubenil cu 12 Medaya di Oro y 14 Record.  Den categoria di 45kg, cu un peso corporal di 44.85kg, Rory a competi den tanto division Sub-15 y Sub-17 di e Panamericano, y den Sub-15 y Sub-17 di e Suramericano. Den snatch, el a habri cu 68kg, sigui cu un exitoso 72kg den su segundo intento, y a faya riba 75kg den su tercer intento. Den clean & jerk, e ta habri cu 91kg, despues di faya riba 94kg den su segundo intento, y na ultimo intento e ta logra 94kg pa sera cu un total oficial di 166kg. Ambos e clean & jerk di 94kg y e total di 166kg ta record mundial youth (sub-17).

Danki na e resultadonan aki den cuater categoria (Panamericano Sub-15 y Sub-17, Suramericano Sub-15 y Sub-17), Rory a bin cu un total di 12 medaya di oro y a establece 14 record nobo: dos record mundial Sub-17, seis record Panamericano (Sub-15 y Sub-17), y seis record Suramericano (Sub-15 y Sub-17).

Cu esaki, Rory ta yega Guayaquil como Campeon Mundial Hubenil (Cali, Colombia, juli 2026) y ta sali tambe como Campeon Panamericano y Suramericano Hubenil, apenas dos luna despues di su debut international y na un edad di 13 aña.

   Ettel Boyce: Segundo Lugar den 61kg B Femenino Senior.  Ettel Boyce a competi den categoria di 61kg, division mayores/senior, cu un peso corporal di 60.05kg. Den snatch, despues di faya riba 48kg den su prome intento, el a logra 48kg den su segundo intento y a faya su ultimo intento cu 50kg. Den clean & jerk, el a faya dos biaha riba 67kg promer cu logr'e den su tercer y ultimo intento, pa asina yega un total oficial di 115kg. Cu e resultado aki, Ettel a termina na segundo lugar den tanda B di e categoria 61kg femenino senior.

   Delegacion di Aruba: E delegacion di Aruba na Guayaquil tabata guia pa Hugo Themen y Michael Bareño, delegadonan di AAWA, hunto cu Spencer Moorman, Cierra Mansergh y Cavan van Ulft, kende nan a coach Rory y Ettel.

   AAWA ta gradici Stichting Sportsubsidie Aruba, Lotto pa Deporte y e Comite Olimpico Arubano, pa nan apoyo grandi na Team Aruba Weightlifting durante e Campeonato Panamericano y Suramericano aki na Guayaquil. AAWA tambe ta felicita Rory van Ulft y Ettel Boyce, y nan coachnan, cu e tremendo resultado aki, cu ta sigui pone Aruba riba mapa mundial di Weightlifting.

   Prepara pa Proximo Competencia: Despues di e tremendo resultado aki, Rory y Ettel ta bek na cas y lo ta preparando pa competi den e Campeonato Nacional di Aruba, cu lo tuma lugar dia 29 di November na Compleho Deportivo Frans Figaroa.