Asina e sistema di registra pa conferencia ‘Anti-Doping’ na September ta funciona

Jonathan Wever, Chief Operating Officer di COA:

ORANJESTAD (AAN) Den un conferencia di prensa reciente, Comite Olimpico Arubano (COA) a duna informacion tocante e Conferencia Anti Doping, cu nan ta preparando pa dia 6 di September venidero.

   Jonathan Wever, Chief Operating Officer, Executive Masters in Sport Organizations Management di Comite Olimpico Arubano (COA), a duna informacion tocante con e registracion ta traha.

  “Nos tin dos online forms cu bo tin cu yena: uno ta pa atletanan y otro ta pa e personal di support di e atletanan. Esaki ta pa tur hende cu tin di haber cu deporte y tambe ta importante pa bisa cu no ta trata solamente na nivel di federacion, pero tambe na nivel di club. Pues, si bo ta entrenador, atleta, of bo tin un otro capacidad dentro di un organizacion deportivo, bo ta mas cu bon bini pa forma parti di e conferencia aki.

   E registracion ta atravez di e online form cu bo ta haya sea riba nos plataforma di Facebook; una bez cu bo habri nos front page bo ta wak’e como link, y si no, bo ta bay riba nos instagram unda bo ta haya links pa registra”, Jonathan Wever a splica.

   El a agrega cu si tin mas pregunta, claramente por manda nan un mensahe via un di e dos plataformanan menciona, si no tuma contacto via e telefon di COA, of via email: This email address is being protected from spambots. You need JavaScript enabled to view it.. Y nan lo duna contesta riba cualkier di e sistemanan aki.

   Jonathan Wever a remarca cu ta hopi importante pa, den e mundo di deporte, conoce bo derecho y debernan, pa locual ta trata e mundo di doping. “Pa locual nos ta haci un invitacion na tur persona atleta of cu ta forma parti di e organizacionnan deportivo aki, pa participa den e conferencia aki. E ta gratis y ademas bo ta haya algun gift di regalo”, Wever a menciona.

   El a indica tambe cu COA ta haci, diferente bez pa aña, momentonan di educacion di ‘ND doping’. “Claramente e organizacionnan cu ta  participa den e diferente weganan no ta organiza algo specifico pa nan, of durante e simposio anual di e Comision di Atletanan, tambe nos ta haci e parti di ‘ND doping’ y nos ta haci diferente ehercicio, weganan, cu ta hopi interactivo y hopi leuk.

Asina aki, tin formanan mas agradabel di informa y educa e hobennan kico ta e derecho y e debernan den e parti di doping”, Jonathan Wever, Chief Operating Officer di COA, a relata.