Roony Boye cumpliendo awe 55 aña den arte marcial

Cu cantidad di reconocemento

ORANJESTAD (AAN): Awe 6 Juni 2022 ta exactamente 55 aña pasa cu e conocido karateka Roony Boye a cuminsa cu e deporte di arte marcial na Aruba. Roony Boye a cuminsa practica arte marcial Kyokushin Karate na Savaneta Kamp cerca e military Poeteria.

   Roony a nace dia 14 Juli 1959, y el a cuminsa practica Karate cu su 8 aña y a dedica hopi tempo den Kyokushin. Despues cu Poeteria a bay Hulanda, Roony a bay sigui practica cerca defunto Franky Kuiperi na Maria College.

   Practica scondi:  Roony tabata haci e deporte aki scondi pa su tata no sa, pasobra e tempo ey disciplina tabata hopi halto. Mayornan no tabata gusta pa nan yiunan ta hinca den deporte cu violencia.

   Roony a logra pasa su examen di Karate y ora el a bay tur contento cu su logro, el a hay’e confronta cu su tata cu a dun’e su sota. Despues e tata a ripara con dedica Roony ta den e deporte y a cuminsa apoya su yiu.

   Diferente titulo na Aruba: E tabata asina dedica den Karate cu den diferente torneo na Aruba, el a bira campeon. Esey a pone tambe cu Roony a bay competi den exterior y a repesenta Aruba dignamente.

   Por ehempel Roony a bay Japon varios biaha, Polonia, henter region den Caribe, Italia, Finlandia, Kazakhstan.

   Mirando su fanatismo pa Karate, Roony a sali den un revista di Karate como e Karateka cu a tira e mihor skop.

   Introduci Muay Thai:  Roony Boye ademas di Karate, a dedica den Muay Thai Kickboxing. Esaki tabata na 1989 y na 1990 el a bira oficial na Aruba. Hunto cu Tom Harink di Hulanda, un conocido instructor di Muay Thai Kickboxing na Europa y reconoci na Thai Land, Roony tabata practica Muay Thai.

   Despues di 9 luna entrenamento intensivo, Roony a habri su promer school (Doyo) di Muay Thai na Aruba. E deporte aki a crece na Aruba y a haya masha hopi acogida. Den Muay Thai Kickboxing tambe Aruba a conoce hopi atleta cu a destaca den exterior. Tur esaki ta danki na Roony Boye, un persona cu a pasa su conocemento den arte marcial na tur su alumnonan.

   Mix Free Fight: Roony Boye tabata e promer cu a bin cu pelea den cage (Mix Free Fight). Esaki tabata na 2001 caminda e eventonan a tuma lugar den Havanna den aire liber.

   E Mix Free Fight awendia ta yama MMA. Masha hopi hende a bay mira e evento aki. Esaki a haci tambe cu Rooy Boye ta miembro di GAMMA cu ta Global Association of Mixed Martial Arts.

   Reconocimento: Roony Boye a haya hopi reconocimento den exterior pa su dedicacion den arte marcial. El a forma parti den comisionnan internacional. Actualmente Roony Boye ta forma parti di e staff di comite di Japon, WKO (World Karate Association).

   Di e 93 paisnan cu ta forma parti di e asociacion aki, Roony Boye ta un entre e 10 paisnan cu a keda escogi. Tambe e ta vice president Panamericano Muay Thai, representante di Aruba pa Thai Land (WMF), president di asociacion di Muay Thai Caribe y ex president di Muay Thai Aruba.

   Pasa conocimento na yiunan: Roony Boye a percura pa pasa su conocemento na su dos yiunan homber, Allen Boye y Rygell Boye. Ta asina cu Allen Boye ta un blackbelt den Kyokushin Karate y ta hopi dedica den e deporte aki mientras cu Rygell Boye a dedica den Muay Thai.

   Ambos tin nan Doyo y ta siguiendo cu loke nan tata Roony Boye a siña nan.

   Ta di aplaudi e dedicacion di Roony Boye den arte marcial y con e ta sigui ta activo.  DIARIO ta felicita Roony y henter su famia cu e logro aki.