Resultado di exitoso Car Rally Aruba Lions Club

ORANJESTAD (AAN): Aruba Lions Club tabata tin su actividad pa recauda fondo y e biaha aki a organiza un Car Rally caminda cu varios famia, amigonan, coleganan di trabao y hasta grupo di bisiñanan a uni pa forma grupo.

   Riba un diasabra den oranan laat di atardi e gruponan a cuminsa yega na Aruba Lions Club na Eagle, caminda a registra e autonan y participantenan pa asina prepara pa sali na momento cu ricibi e reglanan y e prome tareanan via WhatsApp.

   Sigur por bisa cu e tabata un anochi caminda cu cada grupo por a pasa algun ora di diberticion y gosa di e tareanan cu nan mester a haci y pa mas of menos 10:30 di anochi tur participante a drenta y trece tur locual nan mester a cumpli cune y pa despues keda en espera di e resultadonan.

   E di tres lugar a bay pa e grupo “King & Queens of the Jungle”, mientras cu na di dos lugar a bay pa e grupo “Pegado di Pleister” y e ganador absoluto a resulta e grupo di “Bou Palo Geng”.

   Tambe e premio special pa e grupo cu mas ambiente a bay pa “Luna Tix” y e grupo mas creativo a bay pa “Sand Blowers”.

   Aruba Lions Club y su comision organizador kier a gradici tur e gruponan y participantenan cu a haci e actividad aki uno asina dibertido y exitoso y tambe ta gradicinan pa nan contribucion pa asina Aruba Lions Club por sigui yuda den comunidad.

   Tambe mester gradici tur e companianan cu a yuda haci e Car Rally aki posibel, cu ta: OCL Cargo, Plus Accountant, Citgo Boulevard, Holiday Inn, Universal Technologies Aruba, Smith & Dorlas, Xavier University, Emco Production, Setar NV, Bingo Aruba, y sin lubida señora Poppy y sr. Dello Maduro cu a hinca e rally aki den otro.

   Aruba Lions Club na mes momento ta preparando pa un siguiente actividad cu pronto lo worde anuncia caminda tur hende por bin pasa ratonan alegre un biaha mas.