Red Machine a gana y ta pasa pa final di Double-A

*E wega ta bao di protesta si  -  ORANJESTAD(AAN): Diasabra Red Machine a logra gana e wega decisivo di e best of five contra Braves 5-0, pa pasa pa final di Double-A.

Despues cu Red Machine a gana e wega anterior pa forza un di 5 wega, Diasabra e batnan di Braves no a logra lanta for di soño.

Den e prome 3 weganan di e serie Braves a bati mas cu 30 hit, pero Diasabra nan a logra apenas 4 hit contra pitcher Rolando Peguero, kende a tira full e wega.

En total Peguero a poncha 13 bateador.

Door di e triunfo Red Machine lo bay enfrenta Atco Indians den e final, pero Braves a entrega un protesta cerca ABBA.

Esaki tin di haber cu presencia di pitcher John Michael Halley den dugout Diasabra.

E tabata uniforma den dugout.

E protesta muy probablemente tin di haber cu e hecho cu Halley a caba di yega bek di Hulanda unda cu el a picha den Hooofdklasse pa Hoofddorp Pioniers.

E no a participa activamente den e wega, pues mester scucha for di ABBA kico e reglanan ta rond di esaki.