Recepcion yen animo pa ricibi Elliott Loonstra na Aeropuerto

Prome para-atleta di Aruba cu a haya medaya di brons

ORANJESTAD (AAN): Recientemente, Minister di Enseñansa y Deporte Endy Croes y Prome Minister Evelyn Wever-Croes hunto cu e representantenan di Aruba Paralympic Committee, amistad y famia a bay ricibi atleta Elliott Loonstra na su yegada na Aeropuerto Internacional Reina Beatrix.

   Paraatleta di taekwondo Elliott Loonstra a haci historia pa Aruba na Santiago, Chile, despues di a bira e prome para-atleta Arubiano cu ta ricibi medaya di brons den e Weganan Para-Panamericano.

   Elliott a perde e prome pelea contra di Costa Rica, pero ta gana e di dos pelea contra Merca y asina logra bataya pa medaya di brons contra Brasil. Elliott a derota su contrincante Joe Gomes di Brasil y di e forma aki a conkista di tres luga den Weganan Para-Panamericano y ta gana e prome medaya di brons pa Aruba den e Weganan Para-Panamericano.

   Minister di Deporte Endy Croes ta felicita Elliott cu e triunfo aki, alavez ta felicita coach Luciano Mazzeo y tur esnan cu a contribui pa e logro aki. Aruba ta sumanente orguyoso di bo. Danki pa pone Aruba su nomber briya. Cu deseo, disciplina, determinacion y dedicacion ta logra.