RBC ta renoba nan patrocinio di Aruba Little League

Celebrando Exito Internacional di e Team di 2025

ORANJESTAD (AAN): Durante un encuentro special teni Diahuebs, RBC Royal Bank (Aruba) N.V. a anuncia cu nan a renoba nan partnership como patrocinado di Aruba Little League, continuando nan compromiso cu desaroyo di hobennan y inversion den comunidad na Aruba.  E anuncio ta bini mientras cu e organizacion ta celebra e logronan di e team di 2025, cu a representa e Region Caribe na e torneo internacional di Little League.

   E partnership renoba ta subraya e apoyo continuo di RBC pa programanan cu ta construi liderazgo, disciplina y caracter den hobennan Arubiano. Aruba Little League ta ofrece desaroyo deportivo atletico structura y entrenamento di habilidadnan di bida na centenares di atleta hoben riba henter e isla cada aña.

   “Aña pasa, nos tabata tin un asiento den prome fila, algo remarcabel,” ta loke Pierre Rafini, Vice Presidente, Commercial Banking, Dutch Caribbean y Country Manager, Aruba a bisa.

   “Locual a impresiona nos mas no tabata solamente e baseball, pero mira hobennan siña cu representa algo mas grandi cu bo mes ta rekeri un nivel di compromiso cu mayoria adulto nunca ta logra. Nan a siña esaki na diesdos, diestres, diescuatro aña di edad. Ora nos ta inverti den programanan manera Aruba Little League, nos no ta solamente sostene baseball, nos ta fortalece e structura di nos comunidad.”

   E team di Aruba Little League di 2025 a mustra un nivel deportivo excepcional y dedicacion durante henter e torneo internacional, manteniendo unidad y determinacion mientras nan tabata enfrenta competencia for di tur parti di e Region Caribe. E desempeño di e team riba y pafo di e cancha a demonstra e compromiso di e programa pa desaroya atleta hoben completo cu ta comporta nan mes cu orguyo y respet.

   “E partnership cu RBC ta bay mas aya di apoyo financiero, nan ta berdaderamente compromete pa mira nos hobennan logra exito,” asina Sr. Karel Williams, asistente administrador di districto, na Aruba Little League a bisa. “Nan confianza den locual nos ta construyendo aki ta duna nos coachnan, boluntarionan y famianan e recursonan y confianza pa sigui empuha e atleta hobennan aki pa bira nan miho version. E renobacion aki ta mustra cu ora negoshinan y comunidadnan ta uni cu un vision comparti, nos por crea oportunidadnan cu ta cambia bidanan.”

   E partnership ta sostene infrastructura di programa, ekipamento, entrenamento y biahe pa teamnan competitivo. Alavez e ta permiti Aruba Little League amplia acceso na e deporte, asegurando cu hobennan for di tur tipo di fondo tin e oportunidad pa participa.

   RBC tabata un campeon di deporte hubenil y iniciativanan educativo riba henter isla, reconociendo cu inversion den hobennan ta crea impacto duradero den comunidad. E enfoque di e banco ta pone enfasis riba envolvimento sosteni cu programanan cu ta demostra resultado medibel den desaroyo di hobennan.