ORANJESTAD (AAN): Diaranzon atardi na RBC Bank Sasaki a tuma lugar un conferencia di prensa,
unda cu director di e banco Pierre Rafini a elogia e ekipo di Little League di Aruba cu a bira campeon di e asina yama Caribbean Series, pa asina representa area di Caribe na Little League World Series na Williamsport.
E ekipo di Aruba a haci un bon papel y durante e conferencia di prensa Rafini a indica cu pa RBC tabata un momento historico pa wak e team di Little League representa Aruba y Caribe na Williamsport.
Tabata prome biaha desde 2011, cu un ekipo di Little League di Aruba a bay participa na e World Series.
E director di e banco a duna un pabien tambe na e coachnan y e directiva cu a yuda e muchanan den nan crecemento, desaroyo y tur otro aspecto.
El a gradici tambe e mayornan y famianan di e muchanan cu tambe a dedica nan mes tur tur na e logronan di e muchanan.
Rafini a splica cu como sponsor di Little League di varios aña, esaki ta un muestra di con RBC por duna bek na comunidad.
El a sigui bisa cu e intencion semper ta pa sigui duna bek na comunidad di Aruba, cu ta inclui duna bek den deporte pa yuda e muchanan bira tambe adultonan responsabel.
Na final cada un di e muchanan como tambe e coachnan a ricibi un regalo for di RBC, mientras cu Rafini a priminti di sigui sponsor Little League.
Manager di e seleccion Elwin Rincones tambe a hiba palabra y el a gradici RBC pa su sosten.
“Mi ta kere cu ora cu bo yega na e nivel halto aki, sigur e ta trece un satisfaccion y pa e muchanan sigur un recuerdo pa bida”.
Den nomber di nos tur nos ta gradici RBC pa e sosten y pa kere den e muchanan, segun Rincones.
