Radi Hieroms corona como Universal Teen International Aruba 2023

E lo bay representa e isla na Cancun

ORANJESTAD (AAN): Tabata Diasabra anochi, cu publico presente den Cage Nightclub na King Plaza, a cera conoci cu e representante di Aruba cu lo bay competi otro siman den exterior.  E anochi tabata anima pa Alan Kock y Jennifer Lopez, y tabatin show di baile di Youth in Action, y tambe cantamento di e artista hubenil nobo Sam.

   E organanizadornan di Miss Youth Aruba, a escoge pa Radi Hieroms di 18 aña di edad, wordo corona como ‘Universal Teen International Aruba 2023’.

   E instalacion di e sjerp a wordo haci pa Robin Croes-Ponson, y e coronacion a wordo haci pa Kiara Arends, kende ta e actual Miss Universe Aruba 2022.

   E certamen di Universal Teen International 2023 ta un di e certamennan di mas nobo cu a wordo lanza mundialmente, y e competencia mes lo bay ta na luna di Februari 2023 na Cancun, Mexico.

   Radi a presenta den un trahe elegante, y a identifica su mes como un hoben kende gusta viaha, conoce otro cultura y cuminda.  E ta gusta tambe baile, lesamento, y ta un amante di cuminda.

   Su meta ta pa studia medicina, y un dia e tin soño pa representa Aruba na Miss Universe.  Su deseo ta pa modela pa un agencia renombra di modelahe, y gusta hende y anima personanan cu por sinti nan mes ‘down’.  Radi Hieroms ta ademas un boluntario na Cruz Cora Aruba.

   Trabao boluntario ta importante pa Radi, como cu esaki lo por yuda cualkier persona den futuro.  E ta yuda Cruz Cora como cu e kier studia medicina den futuro.  Y aki ta unda cu Cruz Cora ta dune chens pa yuda hende caba den e area di su futuro trabao.  Pesey e ta haya importante cu cualkier hoben cu kier yuda otro hende, djis check tur e organizacionnan cu ta ofrece yudanza, pa haci esey.

   Radi ta contento cu e tin un corona atrobe riba su cabez, pasobra el a keda 4 aña ausente for di e mundo di certamen di beyeza.  E ta excita pa mustra resto di mundo, kico ta e cualidadnan cu Aruba y su reinanan ta carga y pakico e ta un bon candidata pa e corona di Universal Teen International.

   DIARIO kier a felicita e organizador Robin Croes-Ponson cu e exitoso anochi aki.