ORANJESTAD (AAN): E aña aki 9 coredor 6 di diferente team cu ta core distancia largo lo ta forma parti na e di 46th edicion di e TCS Amsterdam Marathon, cual lo tuma lugar na e famoso stad di Amsterdam.
E aña aki lo bay tin por lo menos 45 mil participante fo'i 134 pais, di cual nan lo sali for di e stadion Olympico, bay den e caya nan di Amsterdam, pasa bou di e Rijksmuseum, core na banda di e Amstel y tambe den e Vondelpark, pa despues termina bek den e stadion Olympico.
E participantenan di Aruba ta coredornan cu tin añas di experiencia caba den e mundo di coremento. Pero asina mes tin cu ta pa prome biaha cu nan ta bay experiencia un marathon. Y e no ta facil, pio e clima cu nan lo bay topa cu ne cual ya a cuminsa haci basta frieu. Pero e coredornan ta bon prepara, algun di nan a experiencia core den mal tempo, of den frieu caba, dus nan ta bon prepara pa e marathon aki. Cual lo bay ta un di e ruta nan mas lihe cu ta ser premira.
E coredornan cu ta bay e distancia di Full marathon ta lo siguiente:
Esther Colina (Viper Strong 2x Full- 9 Half)
Edward Ras (Viper Strong su prome – 5 Half)
Loritsa Ras (Viper Strong su prome – 6 Half)
Vince Solognier (Endurance Center Aruba 14xFull)
Sigfried Godoy (2Fast4U 7x Full – 14 Half)
Alrric Kock (Aruba Sabana Liber Runners 10xFull – 9 Half)
Den Half Marathon tin un coredor, kende ta lo siguiente:
Dennis Conradus (2Fast4U)
Esnan cu ta bai e 8Km Run ta lo siguiente:
Fanory Perez (2Fast4U
Jerry Kock (Viper Strong)
Tur e coredornan kier a yama un danki sigur na nan patrocinador nan, kende nan a deposita confiansa den cada un di e coredornan y pa asina cada un por a logra haci nan viahe posibel. E deseo cu hopi di nan tin ta pa por logra cualifica pa e famoso careda di Boston Marathon.
