Proyecto Preparacion Fisico ta continua den 2025

Comite Olimpico Arubano:

ORANJESTAD (AAN):  Comite Olimpico Arubano ta indica cu despues di un inicio exitoso di e proyecto di preparacion fisico (PPF) cu a cuminsa juni aña pasa cu un proyecto piloto, a dicidi di extende esaki pa 2025.

            Cu apoyo di un programa nobo di PanamSports specifico pa entrenadornan, a logra haya fondo pa asina cuminsa e proyecto aki y awor esaki a wordo prolonga. Despues di un investigacion di nos departamento tecnico, a constata e necesidad mas grandi entre e federacionnan ta e necesidad di un apoyo pa cu e preparacion fisico di nos atletanan.

            Banda di entrenamento tecnico, ta importante pa percura cu e curpa tambe ta desaroya pa asina por carga tur e entrenamento necesario pa logra e obhetivo di mehora y por competi na un nivel halto.

            Pa aña 2025, e proyecto lo conta cu 3 profesional cu lo traha ful tempo pa asina brinda e apoyo di preparacion fisico, pero alabes sirbi como COA su wowonan riba tereno, observando e trabou di e atletanan y entrenadornan.

             E 3 profesionalnan cu lo forma parti di e team aki lo ta Ross Ismail, Lucas dos Anjos y Roberto Chavarria. Hunto cu nan, lo tin Jonathan Wever y Betto Thiel cu lo sigui e proceso di cerca y lo ta bou di guia di e Director Tecnico Monica Fajardo.