Prome torneo di 'Grappling' entre agentenan policial a resulta exitoso

ORANJESTAD (AAN): Recientemente POVA Club situa na Santa Cruz tabata e centro di atencion entre e agente policial pa e prome torneo di “Grappling 2024”.

Cu sosten di coleganan policial 14 polis a participa y demonstra nan talento y esfuerso. Sigur un bataya fuerte entre e coleganan cu a demostra e union y vitalidad haciendo un deporte sano. Vitalidad ta un prioridad den e maneho nobo di mando policial.

            Altocomisario Ramon Arnhem  tambe tabata tey y a haci un demonstración hunto cu agente policial Van der Biezen di e comision cu a inicia e evento aki cu a bira na final exitoso. Pa Arnhem esaki nifica cu nos mester por brinda e sosten na otro pero alavez keda den union pa asina sigui fortalece un hermandad tanto den nos organisacion policial pero tambe como colega. Pabien na e comision cu a haci realidad y exitoso!

            Ganador absoluto tabata agente Werleman, di dos lugar Solognier, di tres lugar Cayama-Perez y na di cuater lugar Escobar Romero.

            Cuerpo Policial Aruba ta sondeando posibilidad cu Grappling y Jui Jitsu por wordo agrega den e training policial pa asina por sigui eleva un miho calidad di e agente policial.