Prome FIFA Forward 7-Turf Project na Aruba a haya oficialmente su ‘Turf Roll Ceremony’

S.V. Nacional ta marca e prome paso di un futuro nobo

ORANJESTAD (AAN): Diaranson atardi pa anochi, no tabatin lugar pa staciona auto mas na Alto Vista.  Un aglomeracion grandi na e veld di SV Nacional, pasobra tabata cla pa un momento special pa futbol Arubano cu e colocacion di e prome rol di turf artificial na e veld aki.

   Y esaki a conta cu presencia di nada menos cu Presidente di FIFA, Sr. Gianni Infantino.  Despues di ausencia di 9 aña, Infantino ta bek na Aruba pa un bishita.

   E asina yama “FIFA Forward 7-Turf Project” ta sigui avansa, creando oportunidadnan nobo pa nos clubnan y generacionnan cu ta bin.

   Ministro Gerlien Croes a describi e fecha di 4 di November 202 como un dia pa recorda den futbol Arubano!  E bishita di Presidente di FIFA, sr. Gianni Infantino, na Aruba a brinda un oportunidad unico pa comparti nos vision y ambicion pa futuro di futbol na nos isla.

   Cu e proyecto na S.V. Nacional, nos ta sigui crea e condicionnan pa nos futbolistanan crece, desaroya y alcansa nan potencial!

   Despues di esaki, a pidi pa tanto President di FIFA,  Gianni Infantino, pa oficialisa e ‘Turf Roll Ceremony’ na veld di S.V. Nacional.  Aki a invita tambe President Randolph Laclé di AVB, Ministro Gerlien Croes di Deporte,

    Hunto asina nan a keda lora e artificial turf pa lora riba e veld, marcando asina e di dos fase di e proyecto aki.  Gobierno di Aruba tambe tabata contento di a forma parti di e momento ey.

    Ta un orguyo pa mira cu Aruba ta logra algo asina grandi y Ministro a elogia President Randolph Laclé kende a carga e vision y mision, y e deseo y soño aki pa asina tanto aña, y e sosten cu el a ricibi di tur partners den tur tempo pa asina e siman aki por a celebra un logro asina pa Aruba.

   Aruba te na e momento aki ta e pais cu ta haya e proyecto di mas grandi di proyecto FIFA Forward 7-Turf Project.  Ministro Gerlien a felicita Aruba, pasobra ademas di e proyecto grandi aki, tin tambe FIFA Arena den hopi bario caba, manera SC United na Boegoeroei, SV Unistars, San Luis Deportivo, Caiquetio, y bayendo awor pa Savaneta y San Nicolas.

   Randolph Laclé a splica cu e proyecto aki a bira realidad danki na perseverancia, y a indica cu ta danki na e comision ehecutivo di AVB cu a traha duro y cu e ta yama “The Team Believe”.  Un total di 7 veld na Aruba lo bay haya turf cubriendo e veld completamente.  Na forma chistoso, Laclé a indica na Infantino cu e lo tin 7 motibo pues pa bin bishita Aruba den siguiente añanan.

   El a bisa cu e ta aprecia e sosten grandi di FIFA na e proyectonan aki.  E proyecto di turf na Aruba ta un gran necesidad di hopi decada caba, y porfin awor e ta birando realidad.

   Pabien na Gobierno y na AVB, kendenan ta sigui move futbol Arubano dilanti.

   Gianni Infantino a hiba palabra tambe, y na final a bay pose cu e teamnan hubenil di SV Nacional, y como cu e muchanan tabata baliando y bula, ata Infantino tambe a cuminza balia y bula cu nan.