Premio Excelencia den Deporte a reconoce atletanan cu a destaca den 2022

ORANJESTAD (AAN): Diabierna anochi, a tuma luga Premio Excelencia den Deporte 2022 unda, cu a reconoce e atletanan cu mas a destaca den nan disciplina pa aña 2022.

   Un anochi magico yena cu emocion y alegria unda a honra  e 130 atletanan nomina, a reconoce 27 entrenado pa nan contribucion den e desaroyo di deporte di Aruba. Tambe, a rindi homenahe na diez baluarte deportivo cu a dedica gran parti di nan bida na desaroyo di deporte di Aruba. Banda di esaki, a reconoce 6 atleta olimpico cu a ricibi un certificado y pin di Olympians for Life (OLY) for di World Olympians Association pa nan esfuerso y pa promove e balornan olimpico.

   Presente na e anochi mas importante di deporte na Aruba tabata Prome Minister Evelyn Wever-Croes y Ministro Endy Croes, como tambe algun Parlamentario.

  E magno evento deportivo a inicia cu recorido riba e “red carpet” di e nominado-, mayor- y invitadonan special cu a tuma un potret como recuerdo di Premio Excelencia den Deporte 2022.

   E anochi bunita aki a keda presenta pa e maestronan di ceremonia Señora Sandra Croes y Sr. Andrew Vrolijk kendenan a haci un excelente trabao. E ceremonia a inicia cu un bunita presentacion di e grupo di baile NLG y NTG bou direccion di Señora Marisol Peña.  A presenta un video di e trabaonan deportivo inicia y/of realisa durante aña 2022- 2023. Sigui pa discurso di Sr. Minister Endy Croes, Prome Minister di Aruba Señora Evelyn Wever – Croes y Presidente di Comision Excelencia den Deporte 2022 Sr. Kenneth Vrolijk.  E momento mas emocionante di e anochi ta ora cu a presenta e ganadonan di Premio Excelencia 2022:

Atleta Masculino 2022 a bira Mikel Schreuders.

Atleta Femenino 2022 a bira Kamilah Dammers.

Atleta Masculino U18 a bira Christiaan Jansen.

Atleta Femenino U18 a bira Mariajose Salazar Salazar.

Atleta Masculino U13 a bira Ocean van Loon.

Atleta Femenino U13 a bira Giovanna Wernet.

Atleta Rising Star Masculino a bira Kailan Wouters.

Atleta Rising Star Femenino a bira Zaria de Groot.

Atleta Paralimpico a bira Elliot Loonstra.

Atleta Special Olimpics a bira Mildred Every.

Ekipo di Aña ta Aruba Voetball Bond.

Rookie of The Year Masculino ta Xylan Anthony.

Rookie of The Year Femenino ta Ava Figaroa.

    Pa conclui, por a observa emocion y alegria riba cara di e atleta-, mayor- y coachnan durante e anochi special aki. E anochi a clausura cu un excelente presentacion di Ataniro Eisden cu a deleita esnan presente cu su exitoso repertorio.