Campeonato di Aruba Open Beach Tennis a bira aun mihor e biaha aki

ORANJESTAD (AAN): E siman aki DIARIO tabata presente na un conferencia di prensa, ora cu nan a anuncia cu tur cos ta cla pa e evento grandi di Aruba Open Beach Tennis Championship cu ta cuminza Diadomingo 12 di November

, y sigui te Diadomingo 19 di November, na e beach na Bushiri.   Evento aki a bin ta colocando su mes na un puesto prominente den mundo di Beach Tennis, desde cu el a start na 2012, y ta atrae hungadornan for di 40 pais.

   Aunke e torneo a bin ta un exito anual, e organisadornan no ta djis keda keto sin move.  Pasobra pa e aña aki, tanto hungador- y fanaticonan lo bay topa cu asientonan individual den e stadion, cu ta cuadra cu demas eventonan mundial di deporte.  Tambe a crea un app nobo pa mobile cu ta inclui schedule, anuncia cual wega ta na caminda riba e cancha principal, y opcionnan di cuminda na e food court, y mas.  Demas avancenan tecnologico ta un pantaya gigantesco nobo di LED cu ta wordo instala, y algun mehoramento mas.

   Ministro di Deporte Endy Croes tabata presente, y el a wordo informa cu e evento di Aruba a wordo poni riba e calender di ITF como un evento ITF BT400, cu ta permiti hungadornan profesional acumula puntonan balioso di ranking.  Anualmente como 1.200 hungador consistiendo di 700 participante internacional y 500 hungador local ta inscribi pa participa.

   Entrada pa e actividadnan aki ta completamente gratis, y pesey tur hende den comunidad ta invita pa bay mira y participa.  Diadomingo awor e kick-off oficial lo ta pa 4:00 pm, y pa 5:00 pm lo tin un Pro-Doubles Invitational Super Tie Break Cup.  Pa 9:00 pm lo bay tin presentacion di Buleria riba escenario.

   Durante henter siman, competencianan lo cuminza ya for di 9:00 am, tanto pa profesional como amateur riba e tantisimo canchanan cu lo tin.  Lo cera Dialuna anochi cu Alain Rockney riba escenario.  Diamars anochi lo cera cu Honeypot riba escenario.  Diaranson lo cera cu DJ Armando riba escenario, Diahuebs cu Ataniro riba escenario, Diabierna anochi cu Tsunami riba escenario, Diasabra anochi cu DJ Yeimy riba escenario, y Diadomingo anochi lo tin DJ Nutzbeatz.