Palo Marga a reconoce Tali Maduro pa su gran dedicacion

ORANJESTAD (AAN): Diasabra anochi na final di e evento di competencianan di streetlegal na Raceway Park Palo Marga, dado momento e organizadornan a yama tur hende hunto, pa asina mustra honor na un persona.

   E organizacion di ABM a dicidi na dedica un momento special na Juan Natalio Maduro conoci como Tali.  Basta aña pasa ya caba Tali tabata riba Palo Marga ta yuda den tur skina.   Ta su amigonan a recorda e organizadornan di ABM cu tin di honra Tali.

   Enberdad, Tali Maduro tin hopi aña riba e pista, e conoce tur regla, e sa con pa resolve tur situacion dificil cu presenta, y ta yuda semper.  Semper e ta dedica us mes na Palo Marga, hasta den momento dificil.

   Pesey ABM a gradici Tali y su famia, pa tur cos cu el a haci pa Palo Marga.  Ademas di esey, nan sa con valioso Tali ta, y pesey tambe a mustra cu tur coredor ta aprecia loke el a haci.  Su dedicacion y aporte na deporte di drag race y na Palo Marga.