Minister di Deporte ta bay duna baseball Double A mas atencion y kier introduci e deporte bek na scolnan

ORANJESTAD(AAN): Durante e conferencia di prensa di minister di Enseñanza y Deporte Endy Croes Dialuna, DIARIO a puntra e mandatario si el a cuminza pensa riba un plan pa drecha Baseball Double A,

mirando entre otro cu ultimo añanan por ehempel nunca e campeonato a cuminza na tempo, e cantidad di wega cu e equiponan ta hunga ta hopi abao y cu for di algun tempo caba e popularidad di Baseball Double A a cay.

Croes a splica cu un minister normalmente no por intermedia directamente den un federacion.

“Un federacion ta wordo eligi pa su miembronan y tin cu haci e trabao pa e miembronan”.

Un minister por duna direccion y conseho of yama un federacion aden y pidi pa e ta mas agresivo of no, segun Croes.

El a splica cu su plan ta pa papia cu tur federacion di tur deporte pa asina inventariza cua federacion ta mas mihor organiza cu otro.

“Den e caso di baseball nos ta lamenta cu pa hopi aña baseball  a pasa den guera eterno entre dirigentenan, unda cu semper tabata tin un division grandi”.

Actualmente tin un bestuur nobo, pero nos no a sinta cu nan ainda.

Nos ta na altura cu nan curazon y pasion ta na e lugar corecto, pues den e simannan nos dilanti nos lo sinta cu e federacion di baseball y plantea algun idea con pa traha den combinacion, na un manera structural y cu bon palabracionnan, segun e mandatario.

El a indica cu un di e puntonan importante ta bay ta pa softball y baseball por ehempel cumpli cu cierto temporada.

“Como minister di Deporte nos kier introduci e deportenan aki bek na scol, bin cu competencia entre scolnan y premionan special pa e scolnan cu gana”.

Por ehempel tal scol tin mester di un airco y un otro scol quizas mester otro material, pues e scol cu gana e competencia e ora ey ta ricibi e premio cu e ta desea, tur cos den margen di presupuesto di e ministerio, segun Croes.