Pabien Aruba cu boso logro na CARIFTA Games

Parlamentario Endy Croes:

ORANJESTAD (AAN):  Parlamentario Endy Croes den nomber di Fraccion MEP ta felicita henter delegacion deportivo cu a representa Aruba na e di 52 CARIFTA Games 2025 cual a tuma lugar na Trinidad & Tabago. Team Aruba tanto den natacion y atletismo a destaca y a regresa Aruba cu varios medaya.

                        Den natacion medayistanan tabata Inald Fernandes Perna, Alyssa Ras, Leandro Santiesteban, Zayron Werleman, Ruben Mansur. Den freestyle relay edad 11-12 Leandro, Shine, Enzo y Zayron a pone un record nacional nobo garantisando medaya di plata y den relay 13-14 aña Jaythan, Gideon, Enrique y Ian Zion a logra medaya di brons. Freestyle relays 400m Vitali, Elise, Alyssa y Jayla a logra medaya di brons.

            Atletanan di Aruba cu a logra un medaya di ORO ta Leandro Santiesteban ORO den 200m breathstroke (boys 11-12), Zayron Werleman ORO den freestyle 200m (boys 11-12), Ruben Mansur ORO den 200m Backstroke (boys 11-12). Aruba ta sali di 5 lugar overall den 19 pais cu a competi. Sigur un logro maraviyoso.

            Pabien Aruba Aquatics Federation, pabien tur atletanan cu a competi y pabien tur atletanan cu a gana medaya. Danki na tur coaches y staff cu a yuda prepara nos atletanan. Sigur danki na e mayornan y familiares cu ta brinda nan sosten incondicional. Pabien Team Aruba! 

Aruba Athletic Federation ( AAF) ta marca historia: Wyndel Beyde cu promer medaya di ORO den historia den atletismo

            Den atletismo delegacion di Aruba Athletic Federation tambe a luci enormemente. Den careda di 5.000m, esta 5K den categoria U20 e rising star Wyndel Beyde ta logra gana e medaya di ORO y ta bira e promer medaya di ORO den historia di Aruba. Christiaan Jansen tambe un atleta prominente di Aruba den e mesun careda aki ta sali na di dos lugar y ta gana medaya di plata. Pues Aruba a domina den e categoria aki y sigur e ultimo minuut tabata momentonan emocionante. Den categoria di U20 distancia 1.500m Asher Patel ta logra un medaya di plata pa Aruba.

            Den un otro categoria U17 e hoben Eden Antersyn ta debuta den 800m y ta logra di 6 lugar. Pues den Track and Field Aruba ta logra 3 medaya uno (1) di oro, dos (2) di plata. Esaki ta un ERA nobo pa Aruba. Awor un GPT Stadion ta completamente renoba cu un Track marca MONDO, e miho na mundo. Nos ta sigur cu nos atletanan lo bay sigui desaroya pa un otro nivel riba e tarima internacional. Un proyecto cu hopi dedicacion y pasion pa boso.  Pabien AAF y pabien Team Aruba!   

Un pabien di curason

            Como un ciudadano y actualmente Parlamentario cu ta apasiona y stima deporte mi ta sumamente orguyoso di nos atletanan pa tur locual boso a logra y tabata momentonan di emocion cu mi tambe a biba hunto cu tur esnan cu a sigui e competencianan aki. E di 52 CARIFTA Games 2025 cual a tuma lugar na Trinidad and Tobago ta laga nos cu un sentimento di alegria y orguyo profundo. Terminando cu e “motto” di inspiracion pa nos atletanan: 4D - Desire-Discipline-Dedication and Determination. Way to Go! Pabien di curason!