Landadonan di Aruba a regresa di CARIFTA cu 30 medaya

Cuatro record nacional di grupo y un final di Top-5

ORANJESTAD (AAN): Bon noticia di Aruba Aquatics Federation, pasobra nan a logra victorianan grandi cu e seleccion nacional di landado, cu un prestacion poderoso na e CARIFTA Aquatics Championships, teni di 20 pa 23 di April na Trinidad & Tobago.

   E competencia aquatico aki di CARIFTA ta wordo mira como esun principal di Caribe pa competencia aquatico segun grupo di edad, cu ta trece atletanan elite for di rond di e region pa landamento y open water swimming, cu mas di 300 landado di piscina y 60 landado di lama, representando 24 pais, y pesey e competencia di e aña aki a habri caminda pa logronan remarcabel, y e atletanan di Aruba a logra grandamente tambe.

   E delegacion di Aruba a consisti di 30 landado di piscina y 2 landado di lama.  Despues di cuatro dia di competencia intenso, e delegacion a regresa e isla bek den tres grupo, yena cu orguyo, medaya, y memorianan cu nan lo keda pa semper cu ne.

   Cu 30 medaya: Aruba a sigura su mes na di 5 lugar overall den e competencia di landamento entre e 24 paisnan, cu un impresionante 30 medaya.

• Mucha Hombernan di 11-12 cu 5 oro, 7 plata, y 5 brons.
• Mucha Muhernan di 11-12 cu 2 plata, y 4 brons.
• Mixed 11-12 cu 1 plata.
• Mucha Hombernan 13-14 cu 1 brons.
• Mucha Hombernan 15-17 cu 6 plata.

   Recordnan kibra: E landadonan hoben no a djis trece medayanan bek pa Aruba, pero mas bien a kibra algun record.

   Inald Fernandes Perna (Mucha Homber 15-17) a impone record nobo di 0:50.80 di 100m Freestyle.  El a kibra e record di national age group imponi door di atleta olimpico Mikel Schreuders na 2016.

   Inald Fernandes Perna (Mucha Homber 15-17) a impone record nobo di 23.56 den 50m Freestyle.  Aki tambe a kibra record di Mikel Schreuders cu ta data di 2015.

    Mixed 11-12 Freestyle Relay (4x100m) y e grupo di Leandro Santiesteban, Alyssa Ras, Jayla Stuut, y Zayron Werleman a impone record nobo cu 4:16.11.

   Mucha Homber 11-12 Freestyle Relay (4x50m) aki Leandro Santiesteban, Shine van Loon, Enzo Croes, y Zayron Werleman a impone record nobo cu 1:52.95.

   Mucha Homber 11-12 Medley Relay (4x100m) ta unda Zayron Werleman, Leandro Santiesteban, Ruben Mansur, y Shine van Loon a impone record nobo di 4:48.46.

   Debut di Open Water: Aki ta algo cu Aruba por ta orguyoso di dje.  CARIFTA a conclui cu un competencia di 5K Open Water, unda Emma Gobert y Ethan Cunha a representa Aruba pa prome biaha den un evento internacional di Open Water.  Ambos landado a demostra stamina impresionante y bon habilidad.

• Ethan Cunha na di 5 lugar (di 16) cu 1:09 ora.
• Emma Gobert na di 6 lugar (di 11) cu 1:17 ora.

   Delegacion di Aruba a logra grandemente danki na un sistema fuerte y dedica pa sostene nan.  Papiando aki di e lider di delegacion cu a coordina e logistica y hunto cu chaperonnan, a sigura e bienestar y seguridad di e atletanan durante e viahe, y a atende tur detaye di esaki cu precision.  Danki tambe na e oficialnan cu no a djis sostene e delegacion, pero tambe a representa aruba riba e escenario internacional pa oficializa competencianan.

   E delegacion na Aruba a wordo invita door di Ministro Gerlien Croes pa bishita oficina di Gobierno tambe pa felicita nan.