Rodymar Geerman, Hefe di Desaroyo di Deporte a anuncia:
ORANJESTAD (AAN) – Den conferencia di prensa di IBiSA (Instituto Biba Saludabel y Activo), señor Rodymar Geerman, “Head of Sports Development & Acting Head of School Sports”, a anuncia y duna informacion tocante e actividad cu ta bay tuma lugar Diasabra otro siman, esta 29 di November cu ta e famoso Aquathlon di IBiSA.
Ta trata aki di e “Aquathlon” cu ta un di e eventonan grandi organiza pa IBiSA, unda cu hopi mucha di scol y docentenan ta participa.
Geerman a señala cu ta bay tin diferente categoria, por ehemplo di 1 pa 6 cual ta e alumnonan di scol basico y secundario, pero tambe e docentenan ta participa den e Aquathlon famoso aki.
Señor Geerman a splica cu ora ta trata di diferente hit, cu lo wordo menciona e dia di e actividad. “Esaki ta bon pa pueblo y tambe mayornan sa, ora nos ta papia di hit pasobra nos tin hopi mucha cu ta forma parti di un categoria y ta bay tin diferente salida, unda cu e miho tempo den e diferente salidanan aki lo bira e ganador. Pues, e ta bon pa nos concientiza pueblo y tambe e mayornan cu ora e mucha den su hit sali e di dos of di tres, pero no a cay den premiacion, ta pasobra diferente hit tabata tin, y e miho tempo den e diferente hitnan aki e ganadornan ta wordo saca”, Geerman a señala. El a agrega cu ta wak mas participante e aña aki, den cual nan ta spera cu na momento cu e informacionnan pa scolnan y inscripcionnan escolar cera, lo por habri pa publico.
“Ora nos papia di publico, kiermen esnan cu no a haya oportunidad pa ta na scol y inscribi, nan toch por inscribi pa nos engrandece e Aquathlon escolar” Rodymar Geerman a señala.
