Mildred Wever, Coordinador Weganan Escolar IBiSA
ORANJESTAD (AAN) Mildred Wever, Coordinador di Weganan Escolar na Instituto Biba Saludabel y Activo (IBiSA), den conferencia di prensa a reitera cu IBiSA ta bay tin nan Aquathlon, Diasabra otro siman, Dia 29 di November.
“E ta un di nos eventonan di mas grandi. Nos ta bay tin un participacion di indivudualnan di 75 mucha, y di relevo nos tin 35 mucha.
Mi kier concientiza cu esaki ta un deporte pa weganan interinsular, cu lo tuma lugar otro aña di 26 pa 29 di Maart, na Aruba mes. P’esey mi ta encurasha tur e mayornan y maestro pa participa, pa inscribi. Te cu otro siman, dia 26 di November pa 4’or di atardi, inscripcion ta cera completamente. E lo ta riba nan pagina di social media, pa tur mayor cu ainda no a haya oportunidad pa inscribi nan yiunan”, Wever a bisa.
El a agrega cu ta bay tin training di Aquathlon riba Diabierna 22 di November na Nikki Beach. E horario lo ta di 7’or pa 8.30’or. “Mi ta haci un peticion hopi grandi na tur mayor pa trece nan muchanan pasobra ta hopi importante pa siña nan di kico Aquathlon ta consisti di dje: e ta core, landa, core.”
