Oficialmente e Campeonato Nacional di Domino 2023 a cuminza

ORANJESTAD (AAN): Den fin di siman tras di lomba, den un Centro Deportivo Betico Croes, completamente decora y colorido cu un ambiente di celebración,

a tuma lugar e tremendo Apertura di “Campeonato Nacional di Domino Balashi 2023” organiza pa Aruba Domino Bond.

   Diabierna a cuminsa cu un desfile di e 8 ekiponan cu ya caba a cuminsa bataya fuertemente contra otro. Aruba Domino Bond a tuma e occasion tambe pa asina reconoce algún baluarte den e mundo di domino local e internacional. A reconoce Sr. Lucas “Herman” Dirksz, Sr. Franklin “Blinky” Spanner, Sr. Carmelo Werleman, Sr. Miguel “Micky” Martinus como tambe Señora Maria “Ija” Kelly.

   Presidente Andy Farro conhuntamente cu Sr. Richard Giel, representando Brouwerij Nacional Balashi, Sponsor oficial di Campeonato 2023  a dirigi algún palabra di plan nan pa 2023 como tambe pa encurasha e ambiente ameno y deportivo, pero tog competitivo entre e atletanan di domino.

   A sigui un brindis, asina conmemora 60 anniversario di existencia di Aruba Domino Bond, Pa después sigui cu tiramento di lot na un forma special.

   Mesora, e prome partidonan a cuminza y manera anticipa, un tabla a cuminsa bula inmediatamente. E resultado di weganan tabata como lo siguiente:

   Weganan di Diabierna: E team di Old Parr DT ta gana Goldstone DT den un encuentro basta presta cu score di 14-11.

   Xtreme DT a cuminsa campeonato den gran forma, dominando Eagles DT cu score di 18-7.

   Noordstars DT a bin pa defende su corona y ta gana di Sportboys DT cu score di 15-10.

   Weganan candeloso a sigui riba Diadomingo: Ayo DT mester a lucha te final pa asina gana Ottley’s DT den un wega no apto pa personanan cu ta sufri di curason, caminda score ta finalisa 13-12 pa Ayo DT.

Xtreme DT, un biaha mas a demostra cu aña 2023 nan tin plan serio, ganando di Sportboys DT comodamente cu score di 18-7.

E fuerte encuentro entre Noordstars DT y Oldparr DT (yama el Clásico di Domino na Aruba) a finalisa cu score di 13-12 pa Oldparr DT.

   Pues un weekend jena di alegría, color, emoción y competencia. Campeonato Nacional di Domino Balashi 2023 ta den full swing.