N.V. Elmar  hunto cu 131 Aruba y S.V. Dakota ta presenta 'Dakota in Blue'

ORANJESTAD (AAN): E temporada di hubentud ta un temporada hopi importante.

E ta un temporada di hopi oportunidad, un temporada di desaroyo y crecemento. Den e temporada aki e mucha y e hoben mester ser sosteni door di e adultonan den nos comunidad y inversion mester ser haci den nan. Parti di e inversion aki ta trata inversion den nan salud mental, y asina aki evita problemanan di salud mental. 

 Internacionalmente estudio ta mustra cu e salud mental di nos mucha y hoben ta mustra un situacion vulnerabel cu nivel halto di ansiedad debi na scol, presion di rendimento y preocupacion tocante nan futuro.  Tanto hende muher como hende homber ta experencia problemanan di salud mental. Sinembargo estudio y literatura Internacional ta mustra cu principalmente e hende homber tin dificultad pa busca ayudo pa problemanan di salud mental y cu na momento cu e hende homber tuma un salida, e no positivo.

Mirando cu N.V. ELMAR ta celebrando 75 aña di aniversario y su inversion den e comunidad di Aruba ta sumamente importante, cu S.V. Dakota ta un organisacion deportivo caminda 200 mucha homber y mucha muher ta practica deporte, y cu 131 Aruba ta cumpli 26 aña invertiendo den nos muchanan y hobenan di Aruba pa medio di informacion, e tres organisacionan a uni forza y ta presenta un campaña pa concientisa e comunidad di Aruba den buskeda pa ta mentalmente saludabel.  

For di inicio di e organisacion (1947), S.V. Dakota ta hungando den su colornan conoci cu ta geel cu preto. Pero S.V. Dakota, N.V. Elmar y 131 Aruba ta haye di sumo importancia pa participa den concientisacion di desaroyonan social ariba nos isla. Hunto cu 131 Aruba, N.V. Elmar y S.V. Dakota kier inverti den desaroyo di nos muchanan y hobenan di Aruba. Pa e luna di november 2025, S.V. Dakota ta cambia su colornan geel cu preto pa e color blauw, Dakota in Blue. Dakota in Blue ta encera cu S.V. Dakota division di honor y U20 durante e luna di november lo hunga den uniform color blauw. E logonan di N.V. Elmar y 131 Aruba lo ta ilustra ariba e uniform di SV Dakota pa e luna di november. Hunto e organisacionan kier concientisa e comunidad di Aruba tocante e importancia di salud mental.
Pa 26 aña caba 131 Aruba ta brindando sosten emocional, conseho y informacion na e mucha y hoben di Aruba, y desde 2022 na esnan di Bonaire, St. Eustatius y Saba, di dialuna pa diadomingo di 2:00 te cu 6:00 di atardi. 131 Aruba no ta haci esaki su so. Dakota in Blue ta un di e tantisimo colaboracionan cu 131 Aruba tin. Banda di e servicio telefonico, email y chat, 131 Aruba tambe ta presente den e sector di enseñansa, deportivo, recreatico y social cu charla, workshop, projecto y campaña di concientisacion. 

131 Aruba ta sumamente contento pa ta parti di e colaboracion entre 131 Aruba, N.V. Elmar y S.V. Dakota, y asina aki hunto cu N.V. Elmar y S.V. Dakota concientisa e comunidad di Aruba tocate buskeda pa sosten pa ta mentalmente saludabel. 

Pa mas informacion tocante e campaña di concientisacion: Dakota in Blue, por tuma contacto via nos website: 131.aw, Instagram: 131aruba, facebook: https://www.facebook.com, email: This email address is being protected from spambots. You need JavaScript enabled to view it. of telefon 5886138/ 5884011.