Muchanan campeon di Little League a regresa Aruba

ORANJESTAD (AAN): Diadomingo anochi e seleccion di Little League di Aruba a yega Aruba bek for di Corsow,

despues di derota Republica Dominicano den e final di e asina yama Caribbean Region Championship di Little League.

Aruba a gana e tremendo wega 9-7 y awor pa di dos aña consecutivo ta bay ta presente na Williamsport, pa participa na e Little League World Series.

Ta di tres biaha cu Aruba ta bay representa Caribe na e World Series, despues di bay na 2011 y na 2024.

Despues cu e muchanan campeon a yega aeropuerto, minister di Deporte Gerlien Croes a bisa cu Aruba ta hopi orguyoso di e muchanan.

“Aruba ta hopi orguyoso di su muchanan y sigur ta gradici e coaching staff y e organizacion cu a haci esaki posibel”.

“E determinacion, dedicacion y animo cu nos a wak e muchanan tin pa representa nos isla, esaki ta locual tin cu lidera tur pensamento, den cualkier decision cu nos tuma pa nos pais y pa deporte”, segun e mandatario.

Durante un conferencia di prensa e coaching staff a indica cu apesar cu Aruba a cay den e ‘grupo di candela’, e muchanan a haci un tremendo trabao pa bira campeon.

E staff a entrega na minister Croes un medaya tambe, como recuerdo di e logro grandi aki di nos muchanan.

E minister di Deporte a bisa cu e tambe ta extra orguyoso mirando cu su yiu tambe a forma parti di e trayecto.