Momentonan di hopi emocion y alegria pa hopi hoben cu tin e soño pa yega Grandes Ligas

ORANJESTAD (AAN)- “Yega leu ta exigi hopi disciplina, pero e ta cuminsa for di chikito. Tambe e muchanan mester tin e materialnan necesario.

E fundacion a wordo lanta cu e meta aki, cu ayudo di boluntarionan. Poco-poco nos ta cuminsa logra e metanan poni, di mira un sonrisa grandi riba cara di nos beisbolistanan chikito y e soño di tin e materialnan pa nan por practica nan deporte faborito. Un mucha mas cu ta practica, ta alehe di e mal caminda,” Sidney Ponson a expresa.

Manera ta conoci, siman pasa despues di hopi trabou realisa a logra concretisa un di e metanan di Sidney Ponson Charity Foundation: Varios material deportivo a yega Aruba. Despues di inspeccion di e materialnan y un presentacion na entre otro Minister di Deporte Endy Croes, e material tabata cla pa wordo reparti bou di e hobennan cu ta practica baseball.  Y esaki a tuma luga durante henter fin di siman. E materialnan ta algo hopi  impotante pa e muchanan. 

  Tanto diasabra como diadomingo Sidney Ponson hunto cu otro expeloteronan Eugene Kingsale y Milton Croes tabata presente pa yuda den e trabou di pasa e diferente veldnan, for di pariba te pabou. 

E tabata un momento di hopi emocion pa mira e cara di alegria bou di e hobennan cu sea a ricibi un glove, e set di catcher of un bat, pa nan por practica nan deporte faborito. Hopi hoben na Aruba tin e soño pa yega Grandes Ligas mescos cu Sidney Ponson a logra.

 Sinembargo ta pasa den dificultad pa motibo di falta di material, sea door cu nan ekipo no tin mucho recurso y/of nan mayornan tampoco. Cu esaki den pensamento e expelotero di Grandes Ligas Sidney Ponson a lanta un fundacion pa yuda e muchanan aki yega mas cerca di nan soño. E mayornan y coach nan a keda sumamente contento y a aprecia e gesto aki.

  E veldnan cu a pasa den e fin di siman aki tabata veld Xander Bogaerts Ballpark, ex Centro di Bario Lago heights Ballpark, Luciano Booshi Wever Ballpark, Rockets na Sta Cruz y na final a para na centro di bario Tanki Leendert unda cu e muchanan di bario di Noord por a bin a ricibi nan material.