Ministro Endy Croes cu bishita oficial na Instituto Pedagogico Arubano

ORANJESTAD (AAN): Diaranson ultimo, Minister di Enseñansa y Deporte Endy Croes a haci bishita oficial na Instituto Pedagogico Arubano (IPA).

IPA ta un scol superior riba nivel di HBO cu ta ofrece, entre otro, estudio pa Maestro di Enseñansa Primario, Bachelor Nederlands als Vreemde Taal y Curso di Certificacion Pedagogico Didactico (PDG).

   Na yegada na e scol, e mandatario di Enseñansa a worde ricibi cu un caluroso bonbini. Durante e bishita, Minister Endy Croes a reuni cu directora di IPA Señora Marilyn Richardson y director di estudionan inicial Sr. Berthson Boekhoud pa dialoga tocante diferente topico di interes di e scol.

   Tambe, Minister Endy Croes a haya un recorido rond di ful e scol pa mira e lokaalnan, deficiencia den e parti di infrastructura y algun trabao realisa recientemente. Ademas di esaki, e mandatario di Enseñansa a bishita un les di Enseñansa Primario di e materia Vakdidactiek voor Natuur en Teccniek en Mens Maatschappij di e docentenan Sr. Gregory Richardson y Señora Mirscha Winterdal.

   Por ultimo, a reuni cu e team di IPA, unda cu nan a haya e oportunidad di haci pregunta y trece nan inkietud- y preocupacionnan dilanti. Minister Endy Croes a contesta nan preguntanan y a duna un splicacion breve di e proyectonan andando pa mehora e calidad di enseñansa na Aruba.

   Pa finalisa, Minister Endy Croes ta gradici directora di IPA Señora Marilyn Richardson, director di estudionan inicial Sr. Berthson Boekhoudt y e team di IPA pa e caloroso ricibimento, alavez ta desea e docente- y studiantenan un exitoso aña escolar 2023-2024.