Ministro Endy Croes a ricibi bishita di e atleta Kendrey Maduro

ORANJESTAD (AAN): Recientemente, Minister Endy Croesa ricibi bishita di Sr. Bernard Maduro y su yiu homber Kendrey Maduro.

Kendrey Maduro ta un hoben atleta di 19 aña di edad cu a studia na Ibero American High School y despues a continua cu su estudio na Merca.

   Kendrey ta un tremendo deportista cu un tremendo talento academico. Kendrey a ricibi un beca na Nashville Florida y den 2024 e ta cabando su estudio. Na augustus 2024 el a worde acepta na UCF cu un “scholarship” di 100%, unda el lo hunga pa UCF den Division 1, cu ta e liga mas halto den College.

   Alavez masha hopi scout ta sigui e peloteronan riba e nivel aki. Sr. Bernard Maduro a comparti cu Minister Endy Croes e historia con hopi nan a traha, pusha y sostene nan yiu homber den e proceso aki, pa asina un dia e por yega Mayor League Baseball. Kendrey a participa na diferente torneo y varios scout tin bista riba dje.

   Den nomber di Gobierno di Aruba, Minister Endy Croes a haci entrega di un medaya pa inspir’e y motiv’e aun mas di loke e ta caba, pa asina e por continua studia bon y hunga baseball riba nivel. Minister Endy Croes a expresa di a keda hopi contento cu e combersacion ameno aki.

   Mandatario di Enseñansa y Deporte a enfatisa cu su portanan ta semper habri pa duna aporte unda cu por duna pa asina yuda nos yiunan di tera pa por logra pasonan grandi den bida. Concluyendo, Minister Endy Croes ta desea Kendrey hopi exito den futuro tanto cu su estudio y carera deportivo. Cu deseo, disciplina, dedicacion y determinacion ta logra.