ORANJESTAD (AAN): Den fin di siman pasa a tuma luga na Wela e competencia di Aruba Open 2022 organisa pa Aruba Practical Shooters Club (APSC).
Aruba Practical Shooters Club ta organisando e competencia pa 28 aña consecutivo.
E aña aki un total di 107 persona a participa na e competencia di tiramento na Aruba di diferente pais manera; Chile, Colombia, Curaçao, Ecuador, Guatemala, Puerto Rico, Merca y Aruba. Un total di 14 diferente ‘station’ y campo di bataya.
Minister Endy Croes tabatin e honor pa diasabra mainta efectua e apertura oficial di e competencia internacional Aruba Open 2022. Minister Endy Croes a basha bala mainta tempran na Wela iniciando e campeonato internacional aki y indicando cu ta un bon tirador.
E publico a gosa e momento aki y a expresa basha bala Minister. Diadomingo den oranan di anochi Minister Endy Croes acompaña pa su esposa Dilailah Croes a presencia e clausura na Courtyard by Marriott unda cu Minister Endy Croes a haci entrega di varios premio.
E mandatario ta felicita Aruba Practical Shooters Club su presidente y directiva pa organisa un otro tremendo competencia riba nivel internacional. Danki na tur boluntarionan y oficialnan pa haci esaki posibel y exitoso.
https://diario.aw/categories/noticia/deporte/minister-croes-a-efectua-e-apertura-oficial-di-e-28-edicion-di-aruba-open-2022#sigProIda4f6366dfe
