Minister a duna  update' di e proyecto di renobacion di Compleho Deportivo Guillermo Prospero Trinidad na Dakota

ORANJESTAD (AAN): Recientemente, Minister di Enseñansa y Deporte Endy Croes a duna informacion di e desaroyonan cu ta tumando luga na Compleho Deportivo Guillermo Prospero Trinidad.

E mandatario di Deporte a indica cu a duna Arubaanse Voetbal Bond (AVB) aprobacion pa e wega di 8 di juni 2024 bay door den e stadion.

            A anticipa cu e stadion lo ta completamente cla mas prome, pero lamentablemente tin algun rekisito cu no ta den man di Gobierno di Aruba, entre otro, algun retraso cu tin den e parti di e atletiekbaan.

            Ademas di esaki, pa aproba e stadion na Dakota, CONCACAF ta exigi pa tin luz di minimo 800 lux. Ministerio di Deporte a inverti den luz cu suficiente iluminacion pa cumpli cu e standardnan aki. Unabes cu esakinan ta instala, e wega di dia 8 di juni por tuma luga.

            E mandatario di Deporte a informa cu a haci tur esfuerso pa e wega por tuma luga dia 8 di juni, pero e stadion no ta lo completamente cla. Despues di 8 di juni, lo bolbe cera e stadion pa asina finalisa e trabou di e pista di atletiek.

            Minister Endy Croes a indica cu e ta premira cu pa september 2024 por inaugura Compleho Deportivo Guillermo Prospero Trinidad na Dakota. Tur detaye y rekisito di e stadion aki ta hopi costoso, pero ta trahando den e proyecto aki cu alma y cuerpo pa hacie realidad.