Luis-Mario Arends a gana medaya di oro den landamento di 1 Km na Curaçao

ORANJESTAD (AAN): Den fin di siman cu a pasa, a tuma lugar na Curaçao e prome Siman Olympico organiza pa FDOK, unda a tene competencia pa tur disciplina di Deporte Aquatico.

   Esaki a inclui e.o. Landamento Artistico di Duet, Solo, y Junior.  Tambe Landamento di Velocidad pa diferente categoria, tanto pa mucha muher como pa mucha homber.  Tambe a tene competencia di Open Water di 1 kilometer.

   DIARIO Deportivo a tuma nota den un informe suministra pa Curaçao Aquatic Association, cu un atleta di Aruba a logra gana den e ultimo categoria ey.

   Den e “Open Water Category 1 Km”, tabatin un total di 13 participante, y resultado di esaki ta cu Luis-Mario Arends di Aruba a sali na prome lugar, y a bay cu e medaya di oro.  Na di dos lugar a finaliza Rayner Colpa di Curaçao, y na di tercer lugar tin Jeamelle Americaan di Curaçao tambe.

   DIARIO Deportivo ta desea Luis-Mario Arends masha pabien cu e logro aki.