Red Stone a suta team  Playa

ORANJESTAD (AAN) -  Na  e domino squate garden  situa net ne grens di Calabas y Kudawecha y net un tiki paseit dje kwihi di mal ehempel,

tabata e scenario diabierna ultimo dje prome wega di domino den periodo di fin di aña, e asina temporada yama “Nos cu Nos”. Dos team cu conoce otro “door en door” a corta sinta cora y habri e torneo. Ta trata aki di Red Stone Dt, lidera dor di Jairo Kelly, y Playa Dt lidera p’un tal “Tanchi”. Biaha pasa Team Playa a sa di gana Red Stone den cas di Team Playa aya na Madiki, y e biaha aki a tribi di sali bay campo pa busca Red Stone den nan propio habitat.

Wel shonnan, manera tabata di spera, e doñonan di cunucu a baha mal rabia ariba e “shonnan” di Playa! Den un frega di wowo, halftime a yega c’un bentaha suave pa Red Stone.

Manera di custumber, e tempo di halftime ta pa goza dje pasapalonan cu chef Han ta prepara cu mi amor completamente gratis pa tur su fiel hungadonan di domino, y despues cu tur presente a refill na ordo, e di dos tempo por a sigui cu aki aya un respo chikito cu ta scapa.

Mucho largo e “stadsbewonernan” no por a wanta presion feroz di Red Stone, y den tempo cortico Red Stone ta domina Team Playa cu score aplastante di 21 -12. Ambiente tabata tremendo sinembargo, ya cu e dos ekiponan aki tin un amistad largo di rivalidad den domino.

E bataya entre nan ta awo 1-1, ban wak con e desenlace final lo ta. Y keda pendiente shonnan, pasobra t’awo temporada hot di batayanan fuerte di fin di aña tey cuminsa.