Kim y Janneke a logra medaya di Oro pa competencia Duet Free

Juegos Centroamericanos y del Caribe 2026

ORANJESTAD (AAN): Cu un rutina bon prepara y ehecuta, e atletanan di Aruba den landamento artistico, esta e duet di Kim Deiman y Janneke Dirven a mustra bon nivel tecnico pa cu e rutina Duet Free y a sa si obtene un score di 209.5225.

   Cu e score ey, ambos a gana e medaya di brons na evento di Juegos Centroamericanos y del Caribe Santo Domingo 2026.

   Den un entrevista, tanto Kim y Janneke a bisa cu e hecho cu nan a gana un medaya ta pone nan sinti fantastico. Nan a participa den e competencia buscando un landamento limpi, aunke toch den nan mente tin semper e deseo di gana un medaya.  Pa nan dos, pa por a yega na di dos lugar ta absolutamente maraviyoso.

   “Nos ta contento di a representa Aruba y contento di tin otro como partner di Duet,” a ser declara.  Loke a yuda ta cu nan tin e experiencia, pues nan sa con pa prepara, y nan sa kico nan kier haci, y enfatiza hopi riba warmups prome cu tur cos.  Tur eseynan ta puntonan cu nan no mester preocupa cu ne, pasobra e ta socede na forma natural den nan mente.  Esey ta algo cu a yuda nan grandemente.

   A puntra nan si nan gusta Duet Tecnico of Duet Free.  E dos dama hoben a bisa cu esey ta dificil pa contesta, pasobra nan gusta tur dos, aunke nan gusta Duet Tecnico mas, toch nan ta sinti cu landamento liber ta mas dibertido.  Pasobra Duet Tecnico ta ponebo enfoca riba djis cierto elementonan cu ta mas cortico, pues tiki facil pa enfoca riba nan.

   DIARIO ta felicita Kim y Janneke cu e fenomenal logro aki.

   Diabierna anochi, atletanan di Aruba a bolbe pa competi como ekipo den e Rutina Team Mixto Liber, pero te na ciere di edicion aki di DIARIO no a ricibi resultado. Pues keda pendiente pa mas detaye di Landamento Artistico.